#CULTURA
Cuestión de tiempo
Román Corbato
Sala Maruja Mallo, Sede de Vigo
Do 28 de xullo ao 19 de setembro
Inauguración: xoves 28 de xullo ás 20:00 horas
Coa actuación musical "15.11.18" (Marco Maril, Macarena Montesinos e Iria Vázquez)
Confirmación de asistencia en participa.cultura@depo.es
Plantas, montañas, océanos, o cosmos, corpos humanos e non humanos coexistimos nun inmenso arco de tempo que desborda a nosa cognición.
Este rico enredo multixeracional e multitemporal foi, en moitas culturas, simplificado por un tempo lineal, antropocéntrico e rexistrado que lle impón o ritmo á historia da humanidade, alienándonos doutras formas de vida e dos nosos propios procesos fisiolóxicos e cognitivos.
Como se articula o tempo profundo nas prácticas artísticas? De que maneiras pode mobilizar as nosas narrativas, subxectividades e as relacións co mundo que nos arrodea?
A través de esculturas, instalacións e fotografías, este proxecto relaciona cuestións de orde e medida, conectando espazos e tempos. O crítico de arte Javier Maderuelo define a idea de lugar coma un fragmento de espazo concreto e característico que goza dunhas calidades particulares e duns sinais de identidade. Poderiamos entender que, tamén, a idea de lugar ten relación con certa especialización da paisaxe que habitamos, polo que, desde este punto de vista, a creación artística se abre cara a formas completamente novas de concibir as súas relacións co medio natural.
Román Corbato
ACTIVIDADES COMPLEMENTARIAS
OBRADOIRO PARA NENAS E NENOS
Inscrición previa en participa.cultura@depo.es
En paralelo á exposición proponse un obradoiro destinado ao público infantil.
- Participantes: nenas e nenos de entre 6 e 12 anos (poden ir acompañados dunha persoa adulta).
- Número de participantes: de 6 a 15.
- Datas: 3 de agosto.
- Horario: unha sesión de 3 horas en horario de mañá, de 10:30 a 13:30 h, cun descanso de 20 minutos a media mañá.
O obradoiro consistirá en analizar o paso do tempo no espazo público da cidade de Vigo. Para iso partirase da obra Berbés, da que se extrae este concepto a partir dunhas ruínas situadas na praza do Berbés. Constará das seguintes partes:
- 1.ª parte: introdución teórica ao traballo do artista, analizando e comentando o proceso de creación das obras da exposición.
- 2.ª parte: visita ás ruínas do Berbés; toma de datos (bosquexos e debuxos) e análises do lugar.
- 3.ª parte: traballo práctico das e dos participantes; a través de debuxos, bosquexos, frottages e doutras técnicas cada participante elaborará unha obra gráfica que relacione o lugar visitado coa idea do paso do tempo.
- 4.ª parte: posta en común dos traballos realizados.
Román Corbato
Xixón, 1980.
Vive e traballa entre Vigo e Ferrol.
www.instagram.com/romancorbato
Artista visual. Doutor en Belas Artes pola Universidade de Vigo e arquitecto pola Universidade da Coruña.
Profesor interino no Departamento de Escultura (2019-2020) e de Pintura (2020-2021 e 2021-2022) da Facultade de Belas Artes da Universidade de Vigo. O seu traballo céntrase na relación do home co territorio e coa natureza e en como observamos, construímos e habitamos a paisaxe que nos arrodea. Participou en exposicións individuais e colectivas a nivel nacional e internacional: de forma individual expuxo, entre outros, no Centro de Cultura Antiguo Instituto (CCAI) de Xixón, na Fundación Florencio de la Fuente, na Pinacoteca Municipal de Langreo, na Cidade da Cultura de Galicia, no Centro Valey de Castrillón ou na Sala Borrón de Oviedo. Entre as súas exposicións colectivas figuran as realizadas no Palacete dos Viscondes de Balsemão do Porto, a Casa Galega da Cultura de Vigo, o Kunstpodium T de Tilburg , a Bienal Internacional de Arte de Cerveira, o Centro Torrente Ballester, o Art Mustang, a Sala das Arquerías dos Novos Ministerios de Madrid, a Het Wilde Weten de Rotterdam, a Sala de Arte Joven de Madrid, a Fundación Camilo José Cela, o Museo de Pontevedra, o MARCO de Vigo ou o CGAC. Tamén participou en feiras coma a Feira de Arte de Oviedo, no JustMad ou no Cuarto Público en Santiago de Compostela. Recibiu premios e bolsas en diferentes convocatorias artísticas, coma a subvención para producións artísticas do Concello de Xixón, Premio Certame Nacional de Artes Plásticas Art Nalón, Premio Proxecto Expositivo á Produción do Centro Valey ou Premio NH Collection Santiago Cuarto Público; foi finalista na XXVI Mostra de Artes Plásticas do Principado de Asturias, Premio III Convocatoria de Intervencións Artísticas nas Torres Hejduk na Cidade da Cultura de Galicia, segundo premio na XXX Mostra de Arte Xove na Rioxa, bolsa Apprentice Master en Tilburg, bolsa de residencia artística en LABoral, bolsa V Encontros de Artistas Novos, bolsa AlNorte, bolsa de residencia artística Estudio Aberto #4 ou a bolsa de asistencia III Festival de Arquitectura en Dubrovnik. A súa obra aparece plasmada en varias monografías e publicacións e atópase en coleccións coma as da Fundación Florencio de la Fuente, da Pinacoteca Municipal de Langreo ou da Fundación Pública Galega Camilo José Cela, entre outras coleccións particulares.
PROXECTO 15.11.18
MARCO MARIL (piano e composición orixinal)
MACARENA MONTESINOS (violonchelo)
IRIA VÁZQUEZ (voz)
Marco Maril (agosto, 1974) é un músico e artista sonoro residente en Vigo que leva máis de vinte anos publicando discos baixo distintos nomes (Apenino, Dar Ful Ful…) co selo madrileño Jabalina Música. Os seus traballos foron presentados en festivais, coma o Festival Internacional de Benicasim, Primavera Sound ou Sinsal, e en teatros de talle internacional, coma o Centro de Arte Oriental de Shanghai. En 2021 Marco Maril iniciou unha nova andaina coa publicación do primeiro disco baixo o seu propio nome e que ten por título 15.11.18.
Esa foi a data na que chegou á súa casa o piano co que, desde entón, empezou a compor as súas novas cancións, acompañado polas tamén viguesas Iria Vázquez, como vocalista, e Macarena Montesinos, no chelo.
Iria Vázquez é unha artista multidisciplinar e doutora en Belas Artes. Realiza e participa en proxectos artísticos diversos que abarcan o ámbito expositivo, audiovisual e escénico, ademais de dedicarse á mediación cultural e á dirección de arte para cinema e televisión.
Macarena Montesinos é unha violonchelista e artista visual, fundadora do colectivo de improvisación HALO e membro activo da orquestra Metamovida.