Mari Luz García Barreiro (Mari)

Na idea de Mari non estivo nunca dedicarse á gandería, de feito estudou Perruquería. Casou nova e emigrou coa súa parella a Alemaña, onde traballou na hostalería e tamén nunha residencia de maiores.

Cando naceu o seu primeiro fillo (posteriormente tiveron una nena) decidiron volver á Estrada. Todo comezou cando compraron un cabalo para pacer nos predios de arredor da casa e logo para que non estivese só comezou a compra de vacas, sempre rubia galega.

Durante un tempo non puideron darse de alta porque o número de cabezas de gando e a superficie que tiñan non llo permitía.

Pouco a pouco foron chegando a acordos coa veciñanza para que lles cedesen as terras e as pacesen as vacas, ata que no ano 2016 xuntaron a base suficiente e se deron de alta. Hoxe teñen 31 cabezas de gando selecto de rubia galega.

Fan a comercialización de xeito directo, é dicir, véndenlle directamente ás persoas consumidoras finais.

Ademais teñen un pequeno rabaño de ovellas e tamén comercializan os años directamente.

Teresa Domínguez Pérez

Breve currículo:

• Doutora en Psicopedagoxía con premio extraordinario de tese
• Premio Nacional de Educación á carreira docente no ano 2017
• Profesora asociada da Universidade de Vigo ata agosto de 2020
• Orientadora e directora do CRA Mestra Clara Torres de Tui
• Docente en cursos de formación do profesorado
• Docente en cursos, seminarios e xornadas
• Colaboradora en Radiovoz e na Radio Municipal de Tui

Rosa Arcos Caamaño

Defínome como unha feminista militante do activismo social e do asociacionismo, sempre busco que facer, como axudar e como traballar a favor da igualdade e das mulleres do rural.

• Directora dos proxectos de cooperación "Bolivia sementando futuro" e "Bolivia, continúa a medrar" en colaboración con Solidaridade Internacional (2004-2006)
• Directora do proxecto ECOMUDES "Muller, medio ambiente e desenvolvemento rural", da Fundación Biodiversidad (2009-2010)
• Organización e dirección dos Encontros de Mulleres Emprendedoras do Medio Rural (Lugo, do 2009 ao 2015), Rural Week 2015 (Lugo) e Rural Tour 2016 (Lugo e A Coruña)
• Promotora da marca Rural Muller denominada "O leite feminista"
• Dirección da enquisa-estudo "As mulleres rurais ante a violencia de xénero", realizada en 2017 a preto de 2.000 mulleres
  • Deseño e dirección de proxectos destinados a loitar contra a violencia de xénero no eido rural:
    • "Axexando xanelas". Ferramenta para loitar contra a violencia de xénero no rural
    • "Fiestras". Para visibilizar a violencia de xénero no rural
    • "Aliadas sororas". Formando e apoderando ás mulleres, tecendo redes de mulleres para loitar contra a violencia de xénero no rural
    • "Cultivando igualdade". Rede de espazos seguros contra a violencia de xénero no medio rural
• Organización e dirección de accións formativas para promover a participación social e a empregabilidade das mulleres no rural:
  • REDMUR. Rede de emprendemento de mulleres rurais
  • RURALTIVITY. Lanzadeira de emprego para mulleres do mundo rural
  • StartUp´s rurais. Plataforma de impulso para iniciativas de emprego para o mundo rural
• Cooperativas de servizos de proximidade para o ámbito rural:
  • Atención a persoas maiores no ámbito doméstico
  • Comidas a domicilio
  • Dinamización sociocultural no ámbito rural
• Envellecemento activo para mulleres do rural
• Alfabetización dixital para mulleres maiores do ámbito rural, socialización en novas tecnoloxías usando as TIC
• Comercialización en liña de produtos artesáns
• Comercialización en liña de produtos agroalimentarios
• Uso das redes sociais para posicionar o noso negocio rural
• Promoción de produtos do rural nos grupos de consumo
• Emprendemento en feminino no eido rural
• Apoderamento e participación social das mulleres rurais

Patricia Rodríguez

Naceu en 1982. É titulada pola Universidade Politécnica de Lugo en Enxeñería Agrónoma.

Logo de rematar a carreira, durante 2 anos exerceu como técnica en asesoramento a produtoras e produtores contratada por unha empresa de servizos.
En 2007 presenta un proxecto de emprendemento e continúa coa empresa familiar de produción de flor cortada e froita (kiwi), ampliando a superficie cuberta de produción e iniciando a comercialización directa.

Durante estes anos traballa pola mellora do sector do agro, pola súa posta en valor e polo recoñecemento do traballo agrario como unha oportunidade de vida de calidade. Durante 8 anos forma parte da directiva de acuBam, asociación de cultivos do Baixo Miño, que representa os sectores agrícolas da comarca. Tras ser durante os últimos 4 anos a presidenta da asociación decide neste 2020 non continuar pola complicada situación persoal na que a sitúa esta crise sanitaria que estamos sufrindo.

Defínese como unha traballadora en favor do agro e do recoñecemento de todos os beneficios que ten para o conxunto da sociedade, amante da natureza e soñadora dun futuro agrario mellor.