Javier Otero Neira e Rut Balbís. Escoitando o silencio. Piano + auriculares Silentsystem + danza.

Concerto incluído tamén no programa “Música no Ar”.

Concerto ao solpor de música accesible para unha experiencia diferencial en todo o espazo do xardín do castelo (por onde transcorre a danza e está o público) e no patio de armas (onde se sitúa o piano).

Escoitando o silencio é un proxecto innovador no que, mediante o uso da tecnoloxía wifi, Javier Otero e Rut Balbís fan un exercicio sen precedentes, cunha proposta artística baseada na intervención musical en espazos únicos nos que o silencio perdura na contorna, e, respectando ese silencio, transcorre o concerto de piano e electrónica con auriculares de última xeración. Trátase dunha intervención artística de Javier Otero Neira na que a música e a tecnoloxía se dan a man coa contorna de xeito moi especial; ademais, intégranse a luz e a propia persoa espectadora para convertelo espazo interactivo e multidisciplinar nunha experiencia difícil de explicar, pero fácil de intuír. Por outra parte, a bailarina Rut Balbís interpretará a coreografía creada ex profeso para este espazo, na que se interaccionará co público e co xardín, na procura de experimentar a música en directo desde o silencio; os auriculares teñen un alcance duns 300 metros vía bluetooth.

Taller Abierto. Re-coñecendo o Castelo: Obradoiro de Arquitectura

Neste obradoiro un grupo de nenas e nenos de 6 a 12 anos coñecerán o valor patrimonial das fortalezas medievais da provincia de Pontevedra. A través dunha actividade entre o xogo e a plástica, reinterpretarase, de xeito creativo, a arquitectura do castelo de Sobroso despois dun percorrido pola zona. Deberanse identificar as partes que conforman a edificación para recoñecer os elementos principais dunha tipoloxía arquitectónica defensiva.

Obxectivos didácticos:

• Conectar as nenas e os nenos coa súa contorna
• Valorar o patrimonio construído
• Identificar e interpretar os elementos que conforman unha fortaleza
• Promover o coñecemento sobre o noso patrimonio
• Desenvolver o sentido da observación
• Espertar nas nenas e nenos o interese pola arquitectura

Taller Abierto son un colectivo formado fundamentalmente por dúas mulleres con formación en arquitectura que fundaron unha empresa de xestión cultural e obradoiros creativos en Pontevedra. Traballan con propostas específicas sobre a arte e a arquitectura, en relación coa contorna e a súa historia. Contan cunha ampla experiencia na realización de obradoiros e proxectos con nenas e nenos.

Duración: 90 min por sesión

Taller Abierto. Explorando a Paisaxe: Obradoiro de Natureza e Creatividade

A contorna do castelo de Soutomaior está considerada o xardín botánico máis importante de Galicia; está formado por xardíns de camelias, viñedos e zona de bosque con castiñeiros, carballos, piñeiros, eucaliptos, liquidámbares, érbedos e loureiros , ademais de distintas árbores senlleiras que destacan polas súas grandes dimensións, idade, orixinalidade ou beleza.

Neste contexto privilexiado proponse unha actividade didáctica onde se combinan a observación e o traballo plástico nun exercicio de apreciación da natureza e de valoración da paisaxe. As nenas e nenos darán un paseo cun caderno de ruta para poder ir completando as diversas actividades propostas relacionadas co espazo que percorren.

Obxectivos:

• Coñecer a contorna do castelo de Soutomaior
• Entender a importancia do medio natural na vida das persoas
• Fomentar o interese na natureza e o medio ambiente
• Promover o coñecemento sobre o noso patrimonio
• Desenvolver a capacidade de observación
• Espertar nas nenas e nenos o interese pola paisaxe.

Para nenas e nenos de 6 a 12 anos acompañados por unha persoa adulta (máximo de 15 parellas)

Duración: 90 min

A Cova das Letras. Frida

Frida é unha peza dirixida ao público familiar na que, a través do corpo en movemento, de títeres e de obxectos, poñemos en valor o poder transformador da arte. Reconstruímos cadros vivintes a través da danza e movemento de obxectos, onde a música xoga un papel fundamental. Trátase dun espectáculo poético, colorido e con moita moita vida. Anxo García é o encargado de deseñar os títeres e seleccionar os obxectos que aparecen na obra. Frida era unha gran contadora de historias e botaba man dun pequeno teatro de títeres para representalas. Contaremos con títeres tradicionais e con obxectos. Olga Cameselle é a encargada de coreografar as danzas e os movementos que nos levan á recreación dos cadros. A música está a cargo do compositor Manuel Paino.

• Actriz e manipuladora: Cris Collazo
• Actor e músico: Martiño Mato
• Composición musical: Manuel Paino
• Monicreques e música
• Para público a partir de 3 anos
• Duración: 45 min

Caldo

Esta primavera verá a luz o novo disco de Caldo, gravado e producido man a man con Alberto Cernadas (crnds). Neste novo traballo déixanse levar a través doutras estéticas e fan que os seus temas tomen camiños imprevistos. Cada tema do álbum representa un vínculo, un momento de cambio, unha relación, unha perda; funcionan coma episodios da procura dun fogar que, aos poucos, imos construíndo xunto ás persoas que queremos. Pronto teremos o primeiro adianto deste disco, á vez intimista e potente, xestado nuns anos convulsos que axudaron a María, Anaïs e Pedro a afondar neles mesmos e a chegar a sitios inesperados que lles permitiron crear historias, letras e melodías cheas de recordos, de presente e de futuro.

María Jorge (violín), Anaïs Barbier (voz e pandeireta) e Pedro Fariñas (guitarra e gaita) forman Caldo, un trío afincado no Valmiñor que achega a música tradicional a contextos sonoros contemporáneos a través da experimentación cos propios instrumentos. Presentan unha proposta na que integran melodías tradicionais galegas e composicións propias con influencias das músicas europeas e atlánticas, unha fusión natural que vai directa ao corazón do público.

Para o seu primeiro disco, gravado en directo, tomaron como fío condutor o repertorio da aldea de Moscoso (Pazos de Borbén, Pontevedra), e fan unha revisión do material recollido por Xisco Feijóo ás informantes Rosa e Aída Garrido.

Selección oficial do Mercat de Música Viva de Vic 2022.Selección oficial do MUMI 2022.

Mellor proxecto de música folk nos Premios Martín Códax da Música 2020.

Gañadoras do Concurso Fran Pérez “Narf” 2020 (Deputación da Coruña).

Mago Teto. Rock ‘n’ Magic

O debut do Mago Teto tivo lugar o Día das Letras Galegas de 1992. Nese 17 de maio subía ao escenario do seu instituto de Viana do Bolo para sorprender as súas e os seus compañeiros. Catro anos despois, chegaba o despegue profesional con A maxia dos soños. Desde a estrea dese primeiro espectáculo en 1996, con tan só 19 anos, o Mago Teto foise convertendo nun dos ilusionistas máis veteranos e relevantes en Galicia. Habitual na televisión desde os seus comezos, goza dun gran recoñecemento por parte do público. Os seus espectáculos adáptanse a calquera tipo de escenario, desde a rúa ata as salas e os grandes teatros. No seu repertorio combínanse, polo tanto, deseños para espazos reducidos con outros de gran formato, o que lles outorga aos seus trucos un amplo abano de posibilidades.

Neste espectáculo un mago de tremenda e contrastada calidade mestura as súas dúas principais paixóns: o rock e a maxia. Era cuestión de tempo unilas e sumarlle ao seu repertorio un espectáculo cargado de ilusións, ritmo, humor e moita moita tralla. Haberá aparicións sorprendentes, xogos de adiviñacion e pequenas e grandes ilusions máxicas. Rock ‘n’ Magic, dirixido por Fran Rei, é máis que un espectáculo de maxia; trátase dun concerto de rock and roll. O Mago Teto, un dos mellores e máis populares magos do noso país, une o seu talento ao de Fer Risco (na batería) e Mon Orencio (na guitarra) para construir un espectáculo onde a maxia convive con algúns dos clásicos do rock and roll.

Elenco: Mago Teto, Mon Orencio e Fer Risco

Dirección: Fran Rei

Xéneros: maxia

Duración: 70 min

Para todos os públicos

Inventi Teatro. As palabras perdidas

A condesa Colorada e o seu axudante Leocadiof son viaxeiros chegados desde moi lonxe. A condesa, unha coñecida contadora con fama internacional, disponse a narrar o seu relato preferido pero, ao abrir o libro, decátase de que o seu conto está cheo de buracos. Faltan palabras moi importantes, coma ganapán, vagalume ou verme. As palabras fuxiron da historia, borradas por falta de uso, e so volverán ao conto se se utilizan de novo. As palabras perdidas é un espectáculo de teatro versátil que se adapta a un espazo interior ou exterior; unha proposta que anima a falar galego dun xeito divertido, dinámico e moderno e que pon en valor o idioma, os ditos e as historias de Galicia. As familias asistentes aprenderán a nomear en galego conceptos sinxelos coma os números, as cores e os hábitos cotiáns. Con todo, tamén coñecerán palabras que se atopan máis agochadas.

Inventi Teatro son Bea Campos e Marcos Alonso, un dúo teatral cómico que comeza a súa aventura no ano 2017 xunto co actor Paulo Medal. A súa ópera prima, A tropa do doutor Milagre, supón un grande éxito para a compañía tras acadar máis de cen representacións en toda Galicia, con presenza en espazos coma o Festival Internacional de Artistas de Rúa de Redondela, a Mostra Internacional de Teatro de Ribadavia ou Itineranta en Pontevedra. En 2020 a compañía bota a andar o seu espectáculo A gran viaxe, e a súa nova produción teatral Á procura das palabras perdidas ten como protagonista a lingua. Inventi Teatro é unha delirante compañía teatral e de clown que imaxina e constrúe espectáculos de rúa para toda a familia, baseados no humor e no movemento, onde o risco e a diversión están garantidos.

Dirección e dramaturxia: Bea Campos

Elenco: Bea Campos e Marcos Alonso 

Golfiños. Silforiña

Silforiña é o novo espectáculo de Golfiños, un concerto agarimoso e cheo de emocións que combina a música e a narración. A historia de Silforiña trata dunha nena que mira a vida a través da súa fiestra. Desde a súa casa, Silforiña soña coa vida e imaxina a cantidade de emocións e historias que pode atopar fóra: unha viaxe en barco, mergullar na bágoa dun poema, asustarse co ouveo dun lobo ou mexerse no luar dunha noite máxica. Serán as cantigas dos Golfiños as que axuden a Silforiña a perder o medo e facer o seu propio camiño? Silforiña fálanos da superación e dos soños da infancia a través da música.

Elenco: Elena Paz Alonso, Jesús Moares Lameiro e Javier Ricardo Álvarez Fernández

Para público a partir de 3 anos

Duración: 45 min

SU.MA. Glamping

Tres amigos, tres personalidades, tres caracteres moi distintos embárcanse na aventura de pasar unhas vacacións xuntos. Pero a convivencia non sempre é cousa fácil e os conflitos toman parte na escena cotiá dos campistas. Superarán as nosas personaxes o reto de compartir un espazo común con elegancia? Que pasará cando se torzan as cousas? "O roce fai o cariño", din... Glamping é un espectáculo creado por SU.MA sobre as relacións humanas, onde calquera podería ser esa personaxe en tensión que busca a mellor maneira de resolver a situación. Haberá teatro xestual, música, acrobacias aéreas, danza e swing en clave de clown. Cando parece que todo está perdido, a creatividade agroma abrindo un camiño inesperado.

Dúas grandes artistas galegas coma Sue Moreno e María Move crean SU.MA para abordar o seu primeiro espectáculo baixo a dirección de Gonçalo Guerreiro (Elefante Elegante).

Trátase dun espectáculo de danza-circo 360º de medio formato, onde dous personaxes crean mundos de fantasía. Xogo e imaxinación, acrobacia aérea e voz cantada en directo son os ingredientes dun espectáculo no que a maxia xorde do uso creativo dos elementos e da destreza comunicativa das interpretes co público.

Elenco: Sue Moreno, María Move, Mark Torrecillas e Gonçalo Guerreiro

Técnica teatral: Circo

Para todos os públicos

Duración: 50 min

Mamá Cabra. Paxaro amigo. Músicas para a paz

Paxaro amigo. Músicas para a paz é un espectáculo que xunta música e teatro nunha mesma celebración. Discordia é unha bruxa que é feliz destruíndo a paz. De feito, a paz prodúcelle picazón por todo o corpo, desde o cocote ata a punta do pé. Discordia goza facendo que todos os animais e os humanos se leven mal. Menos mal que ten unha curmá fada, pois xa se sabe que na familia haiche de todo… Un día acontece algo que cambiará o seu mundo para sempre. Un espectáculo de Mamá Cabra con texto e dirección de Pepablo Patinho e inspirado no libro de Mamá Cabra A bruxa Discordia, unha proposta cargada de mensaxes que inciden nun mundo mellor.

Elenco: Pepablo Patinho, Luchi Iglesias, Gloria Mosquera, Tomi López, Diego Maceiras e Harry Prince

Para público a partir de 3 anos

Duración: 50 min

Nauta. Nino & Mambrú

Nauta é unha nova compañía de creadoras e creadores galaico-francesa que bebe do teatro físico, especialmente do mundo da máscara e dos monicreques. Desde o seu desexo de profundizar e descubrir a arte escénica do día de hoxe, Nauta explora un teatro onde os seus estilos se unen para abrir novos espazos. Un punto de encontro entre artistas de diferentes nacionalidades e disciplinas onde somerxerse no extraordinario da creación e todas as súas posibilidades.

Fortemente inspirado polos grandes dúos da historia da comedia (coma O Gordo e o Fraco e o humor físico de Buster Keaton e Charlie Chaplin), Nino & Mambrú preséntanos un espectáculo de media máscara, inscrito nas venas do teatro físico, a acrobacia, a esgrima, o mimo e a improvisación co público, que converxen para crear unha obra destinada a público familiar. Tamén, como elemento sorpresivo, a obra preséntanos a Ada, a personaxe cómplice que nos serve para darlle unha volta á estrutura clásica de persoa voluntaria que sae a escena.

Elenco: Nauta

Dirección: Nauta

Duración: 45 min

Para público familiar

Fran Rei. Superheroe

En ausencia, por motivos laborais, de Supernai, o noso Superheroe deberá salvar a humanidade de terribles ameazas, sen esquecer a conciliación. Así, deberá loitar contra perigosos axentes malignos mentres prepara as merendas, pon unha lavadora ou cambia un cueiro. E todo, no axustado tempo que lle deixa a apertada axenda de actividades extraescolares dos seus fillos. Unha desventura cómica que bebe tanto das grandes e populares producións cinematográficas de superheroes, tan de moda nos últimos anos, coma da apaixonante experiencia persoal da paternidade, que pretende ser unha sentida e sincera homenaxe a todas as superheroinas e todos os superheroes que, día a día, nos fan a vida máis doada, máis fermosa e máis feliz.

Elenco: Fran Rei

Dirección: Avelino González

Xéneros: comedia e maxia

Duración: 50 min

Para público familiar

Xarope Tulú. Lingoreteira

“Esa é unha lingoreteira”, dicían. O que non sabían era que, grazas a ela, algunhas das historias que vos imos contar chegaron ata hoxe. Esta sesión de contos é unha homenaxe á lingoreteira que hai en nós, a esa parte nosa que permite que a palabra e a oralidade non morran de todo. Achegádevos, que imos botar a lingua a pacer! Lingoreteira é un espectáculo para público familiar que combina a narración oral, a música e a manipulación dun monicreque. En escena, unha narradora e un músico fannos viaxar por novos vieiros a través da música e a palabra.

Elenco: Atenea García e Nicolás Zamorano

Para público a partir de 3 anos

Duración: 45 min