Camelias con nombre de mujer

Camelias con nome de muller

A Deputación de Pontevedra rexistra novas variedades tras unha década de traballo na Finca Areeiro.

A institución provincial renderalles unha nova homenaxe a mulleres ilustres vinculadas á provincia de Pontevedra en forma de xardín. Realizará unha plantación de camelias no castelo de Soutomaior con novas variedades desta flor chegada de Oriente hai máis de tres séculos e que se adaptou perfectamente á climatoloxía das Rías Baixas.

O día 11 de marzo ponse en marcha este novo proxecto coa plantación do primeiro exemplar de camelia ‘María Vinyals', unha nova especie rexistrada ante a Sociedade Internacional da Camelia e cunha antigüidade de doce anos. Esta bonita flor orixinouse na Estación Fitopatolóxica Areeiro a partir dunha semente de Camellia japonica ‘Berenice Boddy'.

Nas instalacións da Deputación consérvase unha planta de seguridade, e a outra da que se dispón é a que lucirá nos xardíns de Soutomaior a partir deste mes de marzo. En próximas datas estará acompañada por novos exemplares con nomes de muller como a camelia ‘Bella Otero', a camelia ‘Rosalía de Castro' e a variedade ‘Jane Andersen'.

‘María Vinyals' é unha camelia dobre en cuxa coloración se distinguen con claridade tres fases: é avermellada ao nacer, rosa unha vez aberta, e avanza cara ao morado cando está a piques de caer da árbore. Cada exemplar levará un cartel indicativo coas súas características e un código QR con imaxes da flor para quen visite o xardín fóra da temporada de floración.

11-03-2020 Plantación dun exemplar da camelia María Vinyals