Novas relacionadas

O "Vive Nigrán", segunda cita dos Festivais Rías Baixas, da o pistoletazo de saída este venres tras a travesía en catamarán ata as Illas Cíes

Praia América acolle a terceira edición do Festival combinando música, gastronomía, lecer e ambiente familiar que a presidenta Carmela Silva visitará este sábado


19 xullo 2019
Vive Nigrán

O Festival "Vive Nigrán", enmarcado nos Festivais Rías Baixas promovidos pola Deputación de Pontevedra, da este venres o pistoletazo de saída a unha fin de semana que encherá Praia América de música, gastronomía, lecer, ambiente familiar e moitas outras actividades. No que respecta aos concertos, no seu cartel conta este ano coa presenza de grupos musicais e artistas entre os que destacan Novedades Carminha, Ángel Stanich, As Chillers, Hidrogenesse, Meneo, Delafé, Os Nastys, Os Vinagres, Monterrosa ou Adriana Proenza, entre outros. Pola súa banda, a gastronomía, con produtos da terra, será novamente protagonista, aínda que combinará as tapas de deseño coa tradicional presenza de pulpeiros.

A presidenta da Deputación de Pontevedra, Carmela Silva, asistirá ao Festival o sábado ás 19.30 horas, e visitará a unha carpa de igualdade da campaña da institución provincial para previr o acoso e as agresións sexuais coa campaña "Eu decido, ti respectas". Amais, en sintonía coa axenda de sustentabilidade da institución provincial, tamén coñecerá os stands informativos pertencentes á campaña "Experiencias Sostibles", que este ano está a concienciar na loita contra os plásticos e nos seus efectos no medio ambiente e na saúde das persoas. En concreto, a campaña de igualdade estará presente mañá e o sábado, e a campaña de sustentabilidade desenvolverase durante a xornada de mañá.

O festival tivo un espectacular aperitivo na tarde do xoves coa travesía en catamarán dende o peirao de Panxón cara as illas Cíes, na que participou a deputada de Turismo, Ana Laura Iglesias. Na embarcación as persoas asistentes desfrutaron a bordo dun concerto da artista Mounqup, unha cata Ginger Ale e unha degustación de produtos de proximidade de Galicia Calidade. Esta cita é unha das tantas actividades que realiza este ano o "Vive Nigrán", que tamén conta con "bautismos" de kayak e surf como novidades.

O ano pasado, o "Vive Nigrán" recibiu a máis de 5.000 visitantes durante as dúas xornadas, das cales 500 pasaron polo stand de Igualdade da Deputación onde se prestou asesoramento e, amais, coa campaña de Turismo Sustentable repartíronse 1.500 ecocabichas.