Noticias

Novas relacionadas

A artista Luz Darriba enche a praza de Galicia de Vilagarcía de cunchas con mensaxes contra a violencia machista na nova acción de "Violencia zero"

No acto participou a deputada de Igualdade, Isaura Abelairas, a concelleira Tania García, alumnado de distintos centros da vila e público xeral


26 marzo 2019
Violencia zero en Vilagarcía de Pontevedra

A Praza de Galicia de Vilagarcía de Arousa acolleu esta mañá unha macro-intervención artística a cargo de Luz Darriba, que encheu este espazo público de cunchas con mensaxes contra a violencia machista. Esta acción, que se converte na décima intervención artística da cuarta edición do programa "Mulleres en Acción: Violencia Zero" impulsado pola Deputación de Pontevedra a través do Servizo de Igualdade, contou coa activa participación do alumnado de varios centros escolares de Vilagarcía, así como coa presenza da deputada de Igualdade, Isaura Abelairas, e da concelleira de Benestar Social e Igualdade, Tania García.

Ao longo da acción "Venus", que se estendeu dende primeira hora da mañá ata o mediodía, Luz Darriba foi construíndo, xunto ás persoas participantes, unha gran cuncha de vieira sobre catro panos dispostos sobre o chan. A figura foise conformando por outras pequenas cunchas, achegadas tanto pola artista como polo alumnado participante, que contiñan mensaxes anti-violencia. Na meirande parte das mensaxes contábase unha historia, que podía ser real ou ficticia, acerca do triunfo sobre a violencia machista, co obxectivo de "deixar claro que da violencia se sae". Ao pouco de rematar a obra, a artista comezou a destruíla. Neste proceso tamén formou parte activa tanto o alumnado como o público xeral que se achegou ata a Praza de Galicia. Cada unha das persoas participantes podían coller unha cuncha que non fora a súa e levala como recordo para a súa casa.

Na súa intervención, a deputada de Igualdade, Isaura Abelairas, apelou á rapazada dicindo que "no futuro lembraredes a cuncha que ides levar este día. Hoxe parece non ter importancia pero plantará a semente da igualdade pola que aínda queda tanto que loitar". Acto seguido, Luz Darriba enumerou as violencias que seguen as sufrir as mulleres e nenas do mundo: "agresións sexuais, ventres de aluguer, escravitude sexual, aborto selectivo, non escolarización...". Unha listaxe que continuou coa lectura, por parte de alumnado existente, de mensaxes contra as violencias machistas e contra as relacións tóxicas.

Este ano 2019 "Mulleres en Acción. Violencia Zero" volve reunir o traballo de 25 artistas especializadas en diferentes modalidades como son a pintura, a música, a danza, o teatro, a poesía, o graffiti ou a performance, vinculadas todas elas pola vontade de ofrecer na súa obra un firme discurso en favor da igualdade de xénero. Esta cuarta edición comezou en novembro de 2018 e novamente se celebra en 25 concellos da provincia (Vigo, Pontevedra, Ponteareas, Salceda de Caselas, Vilaboa, Mos, Ponte Caldelas, Cambados, Vilagarcía de Arousa, Barro, Lalín, O Grove, Silleda, Tomiño, Poio, As Neves, Illa de Arousa, Baiona, Cangas, A Guarda, Forcarei, Gondomar, Cuntis, Meis e Nigrán).

Fotos