Día das Letras Galegas 2020

Día das Letras Galegas 2020

O departamento de Lingua da Deputación de Pontevedra conmemorará este ano o Día das Letras Galegas baixo o lema "A nosa lingua é a nosa identidade".

A pesar de que os actos oficiais se adiaron ata outubro debido á crise sanitaria, a institución provincial considera que é preciso celebrar a lingua como identidade de país todos os días do ano e aproveita para lanzar unha campaña en homenaxe a Carvalho Calero posta en boca de compañeiras e compañeiros do seu propio "gremio", coa colaboración da Asociación de Escritoras e Escritores en Lingua Galega (AELG).

Ata o vindeiro domingo 17 de maio daranse a coñecer 24 vídeos nos que autoras e autores da provincia de Pontevedra lerán pequenos fragmentos de obras de todo tipo do creador ferrolán.

As e os participantes serán Fina Casalderrey, Carlos Taboada, María Xosé Porteiro, Miguel Anxo Alonso, Eva Mejuto, Rafael Fernández Lourenzo, Miriam Ferradáns, Ramón Caride, Tamara Andrés, X. Rodríguez Álvarez, Montse Fajardo, Xosé Luna, Susana Sánchez Arins, Xosé Daniel Costas, Lucía Novas, Álex Alonso, Iria Misa, Cruz Martínez, Nee Barros, Ramón Nicolás, Macamen Alonso, Marta Dacosta e Elena Gallego.

 
 

Última modificación: martes, 19 maio 2020