Día do Libro

Conmemoración do Día do Libro. 23 de abril

Desde a Deputación de Pontevedra sumámonos ao festexo do Día do Libro para promover o poder que os libros dan para voar, para crear e para seguir medrando.

O pasado ano 2020 poñíamos en marcha a Escola de Letras da Deputación de Pontevedra coa editorial Galaxia, un proxecto que tivo unha excelente acollida e que supuxo unha oportunidade para que novas autoras e novos autores entrasen en contacto co mundo da escrita por medio de obradoiros formativos impartidos por autoras e autores destacados do país. Froito dese ano de traballo temos un libro recompilatorio con escritos do alumnado participante da Escola que a Editorial Galaxia publicou baixo o título Tes cinco minutos #1 e que este día imos presentar.

Pero como esta Escola de Letras pioneira é moito máis, aproveitamos toda a súa actividade para partir, nunha acción conxunta con profesionais, amantes da escrita e lectoras e lectores, cara unha posta en valor da lectura, as accións propias baseadas na formación e a aposta pola lingua galega e autoras e autores da provincia e do resto de Galicia. Toda a creatividade, participación e calor cos que destacar o poder dos libros para coller impulso para voar!

As xornalistas Belén López de Diario de Pontevedra, Sandra Penelas de Faro de Vigo, María Hermida de La Voz de Galicia e Ana Baena de Atlántico Diario escollerán fragmentos dalgunha das súas lecturas favoritas para compartila con nós. Estas lecturas formarán parte dun vídeo que se lanzará a través das redes sociais da Deputación de Pontevedra para conmemorar o vindeiro 23 de abril.

Venres 23 de abril, ás 19 h

Sede da Deputación de Pontevedra en Vigo

Presentación do libro recompilatorio do traballo do alumnado durante o primeiro ano da Escola de Letras que a editorial Galaxia publicou baixo o título Tes cinco minutos #1. Contarase coa presenza de Francisco Castro, director da editorial Galaxia e mestre da Escola, e alumnas e alumnos que participarán lendo algún fragmento da súa autoría.

A actividade da Escola de Letras a través dos distintos obradoiros e as lecturas por parte das mestras e mestres: Francisco Castro, Diego Giráldez, Inma López Silva, Anna Figueiredo e Antonio García Teijeiro, poden verse neste vídeo narrado por Rexina Vega, coñecida escritora e investigadora da literatura galega.

Amenización musical con Fernando Barroso e Margarida Mariño (dúo de mandolina e chelo)

A música de Fernando Barroso acompañado pola violonchelista Margarida Mariño inspírase tanto en compositores clásicos doutras épocas coma en instrumentistas actuais de diferentes estilos e lugares do mundo. Xuntos crean melodías que convidan a viaxar, a voar por diferentes culturas e que denotan ritmos do jazz, da música persa ou barroca e da música popular.

Trátase de dous profesionais de recoñecido prestixio na música galega actualmente e que están a levar a súa música máis alá das nosas fronteiras.

Contaremos con intérprete en lingua de signos e dado que o aforo é moi limitado, poderase seguir o acto a través das nosas canles.