O obxectivo principal das visitas guiadas é dar a coñecer os cinco parques forestais seleccionados e experimentar, en primeira persoa, algúns dos principais beneficios que nos ofrecen estes espazos naturais desde o punto de vista físico, pero tamén emocional e social, enmarcados na corrente dos bosques terapéuticos.

Algúns dos obxectivos secundarios que se derivan destes son:

• Dar a coñecer algúns dos parques forestais da provincia de Pontevedra como espazos de lecer para a cidadanía
• Aumentar a oferta de actividades turísticas e de lecer máis acaídas aos tempos actuais de situación sanitaria excepcional
• Fomentar a participación da cidadanía en actividades respectuosas co medio e que provexan as e os participantes de recursos para unha nova perspectiva de interrelación entre o ser humano e a natureza

As visitas guiadas están destinadas ao público xeral, que deberá desprazarse ata o lugar de encontro de comezo da ruta polos seus propios medios. Polas especiais características das rutas nas que se realizará algún tipo de dinámica relacionada cos bosques terapéuticos, as e os participantes, tanto persoas adultas coma nenas e nenos (cunha ou cun acompañante responsable), deberán gardar, en todo momento, as normas de silencio e de respecto ao grupo, á actividade e ao espazo, indicadas pola ou polo guía .

As visitas guiadas levaranse a cabo en 5 parques forestais da provincia de Pontevedra: PF Cabo Udra (Bueu), PF Freaza (Fornelos de Montes), PF Costa de Oia e Serra da Groba (Oia), PF A Picaraña (Pontareas), PF Camposancos (A Guarda), e terán lugar entre o 18 de xullo e o 27 de setembro segundo o seguinte calendario:

Cada unha das rutas terá un tema central deseñado especificamente para estas visitas, segundo as características e valores de cada espazo, sobre o que xirará toda a actividade, e contará cun enfoque participativo, no que as persoas poidan sentirse integradas na actividade desde o primeiro momento. Fomentarase o uso dos sentidos favorecendo, por exemplo, a percepción de diversas texturas ou cheiros na natureza, sempre coa premisa da conservación e do escrupuloso respecto ás medidas sanitarias actuais.

En cada unha das rutas haberá unha dinámica específica relacionada cos beneficios dos bosques terapéuticos adaptada aos contidos desenvolvidos na ruta e ao espazo no que ten lugar.

As visitas guiadas terán unha duración aproximada de 1 h 30 min. O número máximo de persoas por ruta será de 15 para garantir a calidade da visita e respectar as medidas de seguridade pola alerta sanitaria. Manterase en todo momento a distancia física recomendada e tanto a ou o guía como as persoas participantes usarán máscara. Todas as visitas comezarán ás 10 h para favorecer a procura de tranquilidade e a conexión coa natureza.

As persoas interesadas en participar deben facer a inscrición a través do formulario en liña que estará dispoñible na páxina web da Deputación de Pontevedra a partir do 1 de xullo, data de comezo do prazo de inscrición, que rematará 4 días antes do comezo de cada unha das rutas.

PRAZAS ESGOTADAS

Fotos cedidas por Galicia Máxica

Parque forestal da Freaza – Concello de Fornelos de Montes

Parque forestal A Picaraña – Concello de Ponteareas

Parque forestal Costa de Oia e Serra da Groba – Concello de Oia

Parque forestal Cabo Udra – Concello de Bueu

Parque forestal de Camposancos – Concello da Guarda