Voando nas Rías Baixas

Voando nas Rías Baixas

A Deputación de Pontevedra, no marco do Plan estratéxico de turismo 2017-2020, vai desenvolver distintas accións de sensibilización da poboación da provincia sobre os nosos recursos culturais e naturais.

A paisaxe e a natureza constitúen un recurso turístico de primeiro nivel no destino Rías Baixas e a ornitoloxía é unha actividade que atrae a un numeroso público nacional e internacional.

Por iso, temos o deber e a responsabilidade de conservar o medio natural, xa que en moitos casos está en perigo, como acontece cun gran número de aves que aniñan, viven e viaxan polo noso territorio.

En Europa e España existe unha ampla variedade de proxectos birding, que serven para informar sobre os espazos privilexiados para o avistamento de aves, concretamente, en Estremadura ten lugar cada ano unha das feiras máis importantes de turismo ornitolóxico.

Na provincia de Pontevedra contamos con importantes emprazamentos nos que observar aves singulares durante as distintas estacións do ano.

Persoas destinatarias

Esta actividade ten unha dobre finalidade: concienciar a poboación sobre a conservación dos recursos naturais e achegarlle á cidadanía pontevedresa unha actividade turística diferente.

As afeccionadas e afeccionados á ornitoloxía, as persoas amantes da natureza e todas aquelas interesadas poderán participar nestas rutas coordinadas pola asociación SEO/BirdLife.

Inscrición

Será preciso cubrir previamente un formulario de inscrición. As prazas son limitadas.