Voando nas Rías Baixas

Excursión para a observación de aves no Complexo Intermareal Umia-O Grove

  • Día da actividade: 3 de marzo de 2019
  • Prazo de inscrición: do 18 ao 26 de febreiro de 2019
  • Lugar de encontro: diante do Pavillón Municipal dos Deportes de Pontevedra
  • Hora de encontro: ás 9
  • Prazas esgotadas

Complexo Intermareal Umia-O Grove (reserva ornitolóxica de SEO/BirdLife), O Grove, Pontevedra

Intermareal Umia-O Grove

Situado ao noroeste da provincia de Pontevedra entre os concellos do Grove, Sanxenxo, Meaño e Cambados.

A importancia da súa biodiversidade fixo que este espazo fose protexido con diferentes figuras coma Rede Natura 2000 (ZEC e ZEPA), Zonas Húmidas de Importancia Internacional segundo o Convenio Ramsar ou Zona de Especial Interese Comunitario. Tamén en 2014 unha parte foi declarada Reserva Ornitolóxica de SEO/BirdLife do Grove; é a reserva ornitolóxica máis grande de España, a única de Galicia e a única que conta con medio mariño.

Sen dúbida, é o mellor lugar de Galicia e un dos mellores de España para a observación de aves acuáticas invernantes, tanto pola diversidade coma pola sorprendente cantidade de exemplares, pois máis de 18.000 acuáticas pasan os meses fríos nesta reserva, onde o cullereiro ten a principal localidade de invernada e de paso migratorio galego.

Tamén son destacables as concentracións de limícolas coma gabitas, virapedras, pilros, píldoras, mazaricos, píllaras, biluricos, distintas especies de patos, garzas, gaivotas, carráns ou corvos mariños, que desde o norte de Europa se desprazan a esta reserva para aproveitar a súa riqueza.

Recomendacións, material e asistencia

  • A roupa debe ser cómoda e de abrigo nos meses fríos e o calzado apropiado para moverse polo campo
  • As excursións estarán conducidas por 2 guías ornitolóxicos de SEO/BirdLife de Pontevedra e con experiencia e coñecementos contrastados
  • Por ser unha actividade sensible de avistamento de fauna na natureza os grupos non deben ser moi numerosos, como máximo de 25 persoas
  • Material óptico: cada participante terá á súa disposición prismáticos de observación de aves, así como dous telescopios terrestres de alta gama para poder gozar das aves sen molestalas
  • Material didáctico: achegarase unha guía de aves para cada participante na excursión
  • Notas: recoméndase que todas aquelas persoas que dispoñan de prismáticos e guías de campo os leven

Última modificación: luns, 18 febreiro 2019