#ADepoCoaCultura
Contos e países
Historias que viaxan
Esta exposición trátase dun percorrido pola historia da literatura infantil no que se inclúen as referencias ineludibles aos contos clásicos coma os de Andersen ou Perrault.
Sala Rosalía de Castro, sede da Deputación en Vigo
Do 22 de abril ao 15 de xuño
Inauguración: venres 22 de abril ás 19:00 horas | Confirmación de asistencia en participa.cultura@depo.gal
Na inauguración contaremos coa actuación da contacontos Bea Campos.
As historias viaxan coas persoas e a humanidade tivo que desprazarse por razóns comerciais, a causa das guerras ou polo empobrecemento repentino debido ás malas colleitas e ás inundacións... As historias viaxaron coas persoas, de oriente a occidente, de sur a norte, foron traducidas, reformadas e suavizadas ata chegar a nós. É preciso fomentar a apreciación dese rico patrimonio cada vez máis eclipsado polo veloz consumo que impoñen as pantallas.
As historias viaxaron e foron transformándose; como narracións orais, foron relatos moi importantes nas distintas culturas. Na nosa sociedade os contos pasaron a asociarse á etapa infantil, aos contos que liamos antes de durmir, pero iso ocorreu hai poucos séculos; antes as historias contábanse (para as persoas adultas e a rapazada) ao acabar os traballos, nas reunións, nas fiadas... Os cambios sociais e educativos que implicou a ilustración no século mudaron completamente a visión que a sociedade tiña da infancia e comezou a crearse un corpus de adaptacións para as nenas e os nenos de historias que en principio non estaban pensadas para eles.
Esta exposición organizouse con criterios didácticos, non historicistas; así, trátase dun percorrido pola historia da literatura infantil no que se inclúen as referencias ineludibles aos contos clásicos coma os de Andersen ou Perrault.
Nunha das vitrinas abordaranse as cuestións de xénero a través dos libros con historias dirixidas á educación das nenas e e especialmente a docilidade e o modelo de nenas boas e caladas que se inculcaba na etapa franquista. Ao lado estará o contrarrelato, as historias de nenas independentes e bastante rebeldes coma Pipi Mediaslongas, Matonkikí ou Alicia no país das marabillas, no cal se incide nas convencións e nos protocolos sociais e en como darlles a volta.
Noutra das seccións veremos como os libros reflicten as relacións históricas coloniais do Imperio británico, das colonias holandesas e dos distintos países africanos.
Así mesmo, amosaremos a través de traducións a relación da literatura española e galega con outros países, coma a de Galicia con Cuba a través das historias de Anisia Miranda.
VISITAS DIDÁCTICAS
Como complemento á exposición, levaranse a cabo unha serie de visitas didácticas concertadas, dirixidas principalmente a escolares, que teñen como obxectivo achegarlles ás persoas visitantes á construción e difusión dos contos e as súas implicacións políticas, sociais e culturais. A partir dun formato distendido que engloba dinámicas e prácticas participativas, exploraremos como viaxan as historias e descubriremos a capacidade dos contos para revisar temas como a igualdade, as tradicións ou os patróns de comportamento.
*As visitas didácticas serán ofertadas e concertadas dende o Servizo de Cultura.
Comisariado: Silvia García
Visitas didácticas: Sara Donoso
Coordinación: Servizo de Cultura. Deputación de Pontevedra
Deseño: Servizo de Comunicación. Deputación de Pontevedra
Montaxe: Servizo de Arquitectura. Deputación de Pontevedra
Revisión de textos: Servizos lingüísticos. Deputación de Pontevedra
Sara Donoso
Sara Donoso é doutora en Historia da arte pola Universidade de Santiago de Compostela (USC) e conta, ademais, con estudos de grao en Belas Artes na Facultade de Pontevedra e dous másteres: Máster en Arte, Museoloxía e Crítica Contemporáneas e Máster en Estudos da Literatura e da Cultura, ambos da USC. Centrou a súa carreira en dinamizar a cultura e a arte para dar visibilidade a artistas a través de textos, proxectos didácticos e exposicións, e desenvolve actividades de mediación, xestión e comisariado. Tamén colabora con institucións coma a Facultade de Belas Artes de Pontevedra, o Centro Galego de Arte Contemporánea de Santiago de Compostela (CGAC) ou a Fundación do Deseño e das Artes Contemporáneas (DIDAC) tamén de Santiago de Compostela, ademais de publicar textos científicos e críticos sobre arte contemporánea e cinema. Actualmente, encárgase da programación expositiva da Sala Alterarte do Campus de Ourense (Universidade de Vigo). Entre as súas últimas exposicións destaca o proxecto “Unha mirada a Galicia. Colección CGAC”, tres mostras colectivas que revisan os vinte últimos anos da arte en Galicia a través da colección da devandita institución. Entre as súas publicacións atópanse Miradas cruzadas. Paisaxe e pintura no audiovisual galego contemporáneo (2019); Desbordamentos (entrevistas a artistas) (2021) ou colaboracións en libros como Lume na periferia. Para unha historia do cinema en lingua galega (Galaxia, 2021).
Silvia García González
Cangas, 1973. Doutora en Belas Artes pola Universidade de Vigo (UVigo), durante sete anos traballou no Departamento de Actividades do Centro Galego de Arte Contemporánea (CGAC). Actualmente é profesora na Facultade de Belas Artes de Pontevedra da UVigo.
Na actualidade traballa no proxecto “Rastro material”, feito a partir de arquivos persoais, exposto en 2019 no pazo de Tor da rede museística da Deputación de Lugo e en 2020 no claustro alto do pazo de Fonseca, da Universidade de Santiago de Compostela (USC).
Participou en exposicións coma “Eidos da imaxe” no MARCO de Vigo en 2014. Comisariou as exposicións “En tránsito” no Hospital Provincial de Pontevedra e “Desde as rúas da memoria, fotografías e espazos públicos” no Pazo da Cultura de Pontevedra. No Museo de Arte Contemporáneo da Coruña participou na exposición “Relatos privados y espacios públicos”, e no Museo de Artes Decorativas de Madrid en “Hacer, diseñar, pensar”. Levou a cabo as intervencións “A cidade dende dentro” na biblioteca da Facultade de Filosofía da USC e “A cidade desde fóra” na antiga escola Torrecino na parroquia de Cela, en Bueu. Tamén desenvolveu o proxecto “Os silencios que comeu Alicia” na biblioteca do CGAC.
Como comisaria levou a cabo en colaboración coa ONCE un proxecto táctil con pezas de arte contemporánea expostas para seren experimentadas polo tacto.
En 2020 publicou o seu primeiro libro de poemas, titulado Nenas medrando, coa editorial Chan da Pólvora.
Bea Campos
Bea Campos é licenciada en Arte Dramática pola ESAD de Galicia, onde recibiu o premio de interpretación Marta Siero. É actriz, narradora oral, mestra, directora e produtora.
Na actualidade é docente e coordinadora no CIOV (Centro de Interpretación da Oralidade de Vigo), un proxecto de formación continua creado polo Servizo de Normalización Lingüística de Vigo para recuperar e poñer en valor a nosa tradición oral.
Dende moi nova comezou a contar contos, realizou milleiros de actuacións e levou as súas historias ata o outro lado do océano, participando cos seus espectáculos de narración en galego en festivais de artes escénicas no Brasil, Colombia e Venezuela.
Forma parte da compañía familiar Migallas Teatro, que ofrece diferentes espectáculos para público de entre 6 meses e 100 anos.
Tamén é directora da compañía Inventi Teatro, da que dirixiu e protagonizou o seu último espectáculo Marcho que teño que marchar. Tamén interveu como actriz protagonista nas pezas A tropa do doutor Milagre e A gran viaxe.
Ademais, participou como actriz profesional en diferentes compañías galegas como Inversa Teatro, Avento Producións, Triatreros, Arelas das Artes e outras.
Intervén como formadora e poñente no eido da expresión dramática, da narración oral e da literatura infantil para diferentes institucións (Escola de Teatro Municipal de Tomiño Baixo Miño, Universidade da Coruña, CEFORE, Salón do Libro de Pontevedra, Fundación Ramón González Ferreiro etc.)
Tamén traballou nun gran número de proxectos audiovisuais, coma documentais, series e programas de televisión.
Actualmente é presentadora na canle de difusión de literatura infantil Kalandraka TV, onde achega o mundo do libro a nenas, nenos e maiores.