Noticias

16 empresas poxan por facer as obras da estrada provincial de Baredo que mellorarán o Camiño de Santiago pola Costa ao seu paso por Baiona

O deputado de Mobilidade Uxío Benítez asegura que a nova senda peonil suporá "un antes e un despois" para a veciñanza e para as peregrinas e peregrinos que transitan pola zona


10 xullo 2018
Estrada provincial de Baredo

A Deputación de Pontevedra acaba de recibir 16 ofertas de empresas interesadas en realizar as obras da estrada provincial de Baredo no Concello de Baiona que permitirán unha mellora do Camiño de Santiago pola Costa. O deputado de Mobilidade Uxío Benítez, responsable do proxecto, manifestou que a actuación suporá "un antes e un despois" para a comunicación da veciñanza da zona e tamén para as peregrinas e peregrinos que pasan pola vía, xa que se construirá unha nova senda dun quilómetro de lonxitude e 2,5 metros de largo totalmente accesible que garantirá a seguranza viaria para peóns.

Logo de ter recibidas as ofertas para a obra, os servizos técnicos da Deputación terán que analizar nos vindeiros días a documentación presentada polas construtoras e facer unha proposta de adxudicación. Entre as cuestións que se van estudar está o programa e equipo de traballo para a obra (18 puntos), o plan de control de calidade (5 puntos), a memoria de traballo (18 puntos), e o plan de actuacións ambientais (8 puntos). As empresas que acaden un mínimo de valoración pasarán á seguinte criba, a valoración económica, onde o menor prezo ofertado obterá un máximo de 51 puntos.

Unha vez escollida a adxudicataria, deberá ser aprobada en Xunta de Goberno e a partir de aí formalizarase o contrato e presentarase a acta de reformulación da obra. O prazo de execución está fixado en seis meses logo do inicio dos traballos que, se non se producen complicacións, poderían comezar a finais do verán. A obra realizarase grazas ao investimento do Departamento de Mobilidade provincial en convenio co Concello de Baiona, que financiarán ao 80 %-20 % o importe de 381.022,32 euros respectivamente.

Segundo explica o deputado Uxío Benítez, as estradas provinciais EP-2202 e EP-2203 que coinciden co Camiño de Santiago e onde se fará a actuación da Deputación teñen nestes momentos características unicamente axeitadas para a circulación de vehículos, facendo que as persoas teñan que correr riscos ao transitar pola zona.

Por este motivo construirase a senda, limitarase a velocidade dos coches a 30 quilómetros hora, e instalaranse redutores físicos de velocidade de vehículos para calmar o tráfico de xeito efectivo. Por último, construirase un miradoiro no lugar de Monte Alto, onde se habilitarán uns bancos para poder gozar da paisaxe nunha cota de 100 metros sobre o mar con vistas á badía e á cara sur das Illas Cíes.

Segundo lembrou o nacionalista, levar adiante o anteproxecto elaborado pola Deputación foi moi laborioso e prolongado no tempo, xa que nun primeiro momento foi paralizado pola Dirección Xeral de Patrimonio e foi preciso modificar o deseño en varias ocasións.