Noticias

A crise comercial entre China e EEUU, primeiro tema do ciclo de conversas organizado pola AS-PG e a Deputación

O faladoiro será mañá ás 20 horas no salón de actos do Edificio Administrativo da Deputación e contará con Marola Padín e Fernando Arrizado


19 novembro 2019
Fálase de ..

‘ Tensión estratéxica China-EE.UU. Fálase de guerra comercial entre China e EEUU.

Que é iso? Como nos afecta? Que posibilidades temos de que non nos afecte?'. Ese será o tema que centrará o primeiro faladoiro do ciclo de conversas organizado pola AS-PG e a Deputación para abordar a actualidade dende unha perspectiva galega. Desenvolverase mañá mércores ás 20 horas no salón de actos do Edificio Administrativo da Deputación.

Esta primeira conversa, que será conducida por María Bará e contará coa presenza da deputada de Lingua María Ortega, terá como protagonistas a Marola Padín Novas e a Fernando Arrizado Abuín. A primeira relatora é licenciada en Ciencias Políticas na Universidade de Santiago de Compostela, colaboradora do IGADI e analista do Observatorio da Política China (OPCh), investigadora visitante na Chinese Academy of Social Sciences (CASS) e profesora visitante na Jiangsu Normal University, ademais de colaboradora con diversos ‘think tanks' (Atlantic Community).

Pola súa banda, Fernando Arrizado Abuín, é xornalista e máster en política internacional pola Universitat Pompeu Fabra.  Traballou en Vieiros, El Progreso, Faro de Vigo, foi correspondente en Buenos Aires para El Periódico de Catalunya e actualmente é responsable da sección de Internacional de Nós Diario. En 2008 foi premio de xornalismo Johán Carballeira na súa sexta edición.

A Asociación Socio Pedagóxico Galega e a Deputación de Pontevedra teñen organizado a charla de mañá dentro do ciclo de conversas ‘Fálase de…', onde se pretende crear un espazo divulgativo e formativo tanto sobre a actualidade galega como de temas que afectan ao país de calquera xeito.

Os obxectivos básicos dos faladoiros son descubrir a importancia dos distintos contextos educativos mais alá dos sistemas regrados de aprendizaxe, fortalecer criterios propios de opinión, crear conciencia de que o "saber" ocupa lugar e fai persoas máis libres e con máis capacidade de decisión; e tecer redes de coñecemento para enriquecer a comunidade.

Programa

O ciclo de conversas comeza mañá mércores 20 e continuará esta semana, o venres 22, cun faladoiro sobre ‘Por que o cambio climático é a maior ameaza da historia?', da man do doutor en Ciencias Químicas Manuel Vicente, quen desde outubro de 2006 dirixe e presenta o programa de divulgación científica da Radio Galega Efervesciencia, e do xornalista científico de La Voz de Galicia Xavier Fonseca.

A vindeira semana (venres 29) tocaralle a quenda á tertulia sobre ‘Quen son sen desterró? Emigración, inmigración e exilio na Galiza actual'; o mércores 4 de decembro falarase de xornalismo: ‘Que xornalismo precisa o momento actual? Cales deben ser os seus códigos de actuación?'; e finalmente o mércores 11 de decembro o tema central serán ‘As mulleres no mundo do deporte de competición', da man de Vero Boquete, futbolista profesional, e de Cristina López Villar, profesora da facultade de Ciencias do Deporte e a Educación Física e autora do libro ‘Pioneiras do deporte en Galicia'.

Todas as conversas serán ás oito da tarde no salón de actos do Edificio Administrativo da Deputación (avda. Montero Ríos) e son abertas ao público.

Programa (pdf)