Noticias

A Deputación adxudica a urbanización do contorno do centro de día de Silleda, que estará rematada no outono

O deputado Uxío Benítez explica que se creará unha senda peonil de medio quilómetro e espazos públicos de convivencia


13 marzo 2019
Visita a Silleda

A urbanización do contorno do novo centro de día de Silleda estará rematada no outono. Así o manifestou hoxe o deputado provincial de Mobilidade, Uxío Benítez, quen anunciou que a Deputación de Pontevedra acaba de adxudicar de maneira oficial as obras de mellora á empresa Coviastec por 448.077,47 euros. Segundo explicou o nacionalista, o proxecto inclúe a creación dunha senda peonil de case medio quilómetro e dúas zonas de convivencia con tratamento de praza, ademais de habilitar unha ‘zona 30' de velocidade máxima para os vehículos e de instalar dispositivos de calmado de tráfico.

Benítez destacou que esta obra cumpre cos obxectivos do actual Goberno da Deputación, xa que beneficiará a mobilidade da veciñanza desde o centro da vila cara a un núcleo de centralidade onde, ademais do centro de día, están tamén as instalacións da Semana Verde, o campo de fútbol ou o principal centro hoteleiro da comarca, entre outros equipamentos. "Como é ben sabido, os nosos proxectos están centrados nas persoas e neste caso facilitarase o acceso en condicións de seguranza viaria a unha zona de moita actividade na vila", subliñou.

Unha vez adxudicados formalmente os traballos (polos que competiron 15 empresas das que tres foron excluídas) ábrese agora o prazo para a sinatura do contrato, a entrega de documentación, e para presentación da acta de reformulación, trámites que poderán prolongar o inicio das obras ata o mes de maio. A intención é que as máquinas comecen a traballar de maneira inmediata logo de solucionar os pasos burocráticos e que o prazo de execución dure cinco meses -contados desde o inicio da actuación-, polo que o cambio de imaxe da contorna do centro de día de Silleda poderá ser unha realidade no outono se non se producen contratempos coa climatoloxía.

O proxecto de mellora da mobilidade peonil na contorna do centro de día é froito do convenio de colaboración da Deputación co Concello de Silleda, no que se establece que a institución provincial afrontará o 70 % do custo da obra e a Administración local o 30 % restante. Esta actuación foi unha das primeiras peticións do alcalde de Silleda ao deputado Benítez, ao considerar que era preciso coordinar a construción do equipamento cunha mellora nos accesos. A cooperación entre ambas administracións fixo posible que o equipo de arquitectos do edificio fose o mesmo ao que a Deputación encargou o deseño da nova urbanización, polo que haberá coherencia e unidade de actuación no conxunto do espazo.

Grazas ao proxecto impulsado polo Servizo de Mobilidade crearase unha senda peonil de 2,5 metros de largo e habilitaranse novos espazos peonís e zonas verdes nun contorno de velocidade máxima de 30 quilómetros por hora. Instalaranse dúas zonas de convivencia con carácter de praza urbana diante do hotel e do campo de fútbol, renovarase o alumeado público, saneamento e abastecemento, soterraranse as liñas eléctricas, e faranse traballos de xardinería que se completarán con novo mobiliario urbano para crear un espazo público de convivencia de gran calidade.