Noticias

A Deputación amplía o seu apoio aos concellos cun novo servizo da súa plataforma informática: a cita previa para a atención cidadá

Esta nova prestación facilitará a planificación do control do aforo nas oficinas municipais e súmase ás que xa dispoñen os 53 concellos da provincia adheridos á administración electrónica para organizar as sesións colexiadas de xeito virtual


18 maio 2020

A Deputación de Pontevedra continúa a mellorar a súa plataforma informática para ofrecerlles novos servizos aos 53 concellos da provincia e ás tres mancomunidades que están adheridos á administración electrónica para que lles poidan dar resposta ás novas necesidades de xestión municipal derivadas da COVID-19. Despois de que en abril a institución provincial lles facilitase aos concellos a posibilidade de realizar telematicamente as súas sesións colexiadas a través desta plataforma, agora amplía o servizo para que os municipios poidan asumir con total garantía a atención cidadá nas novas circunstancias: establecerase, a través da sede electrónica, un sistema de cita previa que ofrece a posibilidade de contactar coas oficinas municipais de xeito presencial ou por videoconferencia telemática.

A presidenta da Deputación, Carmela Silva, remitiulles hoxe unha carta aos concellos para informalos desta nova prestación, que xa teñen operativa e que será fundamental para que poidan planificar o control de aforo nas oficinas municipais a fin de axudar "a manter a distancia de seguridade da cidadanía que precise acudir ás dependencias do concello, evitando así colas e aglomeracións".

Coa nova ferramenta, a cidadanía que queira dirixirse ao seu concello para a realización dalgunha xestión terá a posibilidade de facer clic na opción de cita previa na sede electrónica e na solicitude poderá elixir se a cita será presencial, telefónica ou por videoconferencia. Será o concello o que decida que servizos e departamentos terán cita previa, cando lles esixirá ás veciñas e veciños facer a súa reserva e se será preciso facela a través de certificado ou simplemente cubrindo un formulario. Ademais, os concellos poderán organizar diferentes axendas (por exemplo, para o rexistro, o padrón ou outros departamentos) e configurar diferentes franxas horarias de atención ao público. O novo servizo tamén estará dispoñible para tabletas e dispositivos móbiles. Nesta semana, os concellos recibirán asesoramento por parte do persoal da Deputación para que poidan aplicar esta nova función da súa sede electrónica e están programados para tal efecto varios seminarios web, coa posibilidade, se é preciso, de organizar novas sesións de formación.

Este novo servizo complementa os que xa podían realizar os 53 concellos adheridos á administración electrónica coa ferramenta virtual que a Deputación habilitou dun xeito totalmente gratuíto para eles; en concreto, a organización de sesións telemáticas dos órganos colexiados, reunións e plenos virtuais, mesas de contratación a distancia e traballo colaborativo entre persoal funcionario. Ademais, o sistema, ao que se pode acceder a través de ordenadores e dispositivos móbiles, permite retransmisións en directo a través da propia sede electrónica ou de plataformas nas redes sociais, garantindo unha maior transparencia.

Máis polo miúdo, os concellos adheridos a este servizo ofrecido pola Deputación son: Poio, Tui, Cambados, O Rosal, Tomiño, Baiona, Vila de Cruces, Mos, A Cañiza, Bueu, Cangas, Redondela, A Estrada, Lalín, A Guarda, Salceda, O Porriño, Moaña, A Illa de Arousa, Soutomaior, Ponte Caldelas, Ponteareas, Meaño, Gondomar, Salvaterra, O Grove, Silleda, Caldas, Valga, Vilaboa, Meis, Cuntis, Mondariz, Moraña, As Neves, Barro, Forcarei, Catoira, Portas, Pontecesures, Pazos, Oia, Arbo, Rodeiro, A Lama, Covelo, Agolada, Crecente, Campo Lameiro, Fornelos, Dozón, Mondariz-Balneario e Cerdedo-Cotobade, ademais das mancomunidades do Salnés, do Val Miñor e do Morrazo.