Noticias

A Deputación aproba novos investimentos por millón e medio de euros que beneficiarán 12 concellos da provincia

As achegas da liña 1 do Plan Concellos permitirán a Ponte Caldelas, Ponteareas, Cambados, Mondariz-Balneario, Tomiño e Soutomaior acometer obras de mellora en infraestruturas e equipamentos públicos


07 agosto 2020
Plan Concellos

No marco da súa liña de apoio para a dotación de recursos aos concellos da provincia, a  Deputación de Pontevedra acaba de aprobar na Xunta de Goberno unha nova relación de achegas correspondentes ao Plan Concellos por importe de 1,5 millóns de euros, que entre as súas tres liñas beneficiarán a doce municipios: Ponteareas, Cambados, Mondariz-Balneario, Ponte Caldelas, Tomiño, Soutomaior, Redondela, Bueu, Cuntis, Gondomar, O Grove e Salceda de Caselas.

Preto dun millón de euros correspóndense con oito achegas da liña 1 de investimentos, destinadas a Ponte Caldelas, Ponteareas, Cambados, Mondariz-Balneario, Tomiño e Soutomaior. O Concello de Ponteareas recibirá dúas subvencións, unha de 129.470 euros, para acometer a substitución parcial de material da cuberta da piscina municipal; e outra de 113.595,66 euros, que lle permitirá abordar unha rehabilitación na Casa Cultural de Arnoso, destinada a mellorar a eficiencia enerxética, de accesibilidade, funcionalidade e conservación deste inmoble.

Tamén Ponte Caldelas percibirá dúas subvencións, unha de 134.901,24 euros, para acometer a mellora dos itinerarios peonís na estrada do Balneario; e outra de 86.246,87 euros, para reformar a avenida de Galicia, na que se sitúa o Concello, cun proxecto de humanización deseñado para garantir a mobilidade peonil e a accesibilidade.

Tomiño recibirá 238.287,87 euros, que lle permitirán abordar a primeira fase das dotacións deportivas previstas no contorno da Alameda de Goián, mentres que Mondariz Balneario contará cunha achega de 68.603,95 euros con destino ao acondicionamento e mellora do Centro de Saúde. No caso de Soutomaior, a Deputación concedeulle unha achega de 115.000 euros, cos que poderá financiar a humanización do contorno do Centro Multiusos de Arcade e, por último, Cambados recibirá 98.309,17 euros para acometer a capa de rodaxe da vía de acceso ás depuradoras pola costa.

Así mesmo, a Xunta de Goberno aprobou unha nova relación de subvencións ao abeiro da liña 2 do plan, por importe de 321.872,24 euros, coas que os concellos de Bueu, Cambados, Cuntis, Gondomar, O Grove, Redondela, Salceda de Caselas e Soutomaior poderán facer fronte ao pagamento de facturas, realizar tarefas de limpeza e mantemento de distintos servizos municipais  e tamén financiar diversas actividades de índole cultural e deportiva. No caso de Redondela abordará con esta achega a elaboración un plan de reactivación local para paliar os efectos da crise da COVID-19 e outro específico dirixido ao comercio local.

Por último, no que se refire á liña 3 de emprego, o Concello de Redondela recibirá unha achega de 213.145,71 euros para contratar un total de 13 traballadoras e traballadores.

A Deputación de Pontevedra concedeu xa 27,6 millóns de euros do Plan Concellos 2020. Desta cantidade, 16,8 euros correspóndense con achegas aos municipios incluídas na liña 1 de Investimento; 2,1 millóns na liña 2 e 8,6 millóns na liña 3 de emprego.