Noticias

A Deputación aproba o expediente de contratación para a mellora da seguridade viaria na EP-5105 entre as parroquias de Maceira e A Graña, en Covelo

O orzamento destas obras, que incluirán a renovación do firme e a construción dunha senda peonil, ascende a case 300.000 euros


06 novembro 2019
Estrada

A Deputación de Pontevedra acometerá as obras necesarias para mellorar a seguridade viaria na estrada EP-5105 entre as parroquias de Maceira e A Graña, no concello de Covelo, nas que se investirá un orzamento de 288.755,73 euros. A Xunta de Goberno provincial deulle luz verde ao expediente de contratación para a adxudicación, mediante procedemento aberto simplificado, da execución destes traballos.

En concreto, as obras que se prevén desenvolveranse nun tramo de 1,1 quilómetros na estrada. O proxecto inclúe a mellora do firme da EP-5105 entre o punto quilométrico 10+250 e o 11+350, a construción dunha senda peonil, a instalación de elementos de calmado de tráfico (redutores físicos de velocidade e novos pasos peonís) e a creación dunha zona de convivencia con prioridade para viandantes no tramo final, onde non hai anchura suficiente para habilitar a senda. Tamén contempla a construción dunha pasarela de madeira sobre o regato de Portiño Escuro.

A senda peonil proxectada terá unha anchura de 2,5 metros, de acordo cos criterios de calidade da Deputación, e irá paralela ao trazado da estrada, separada da calzada principal mediante marcas viarias e captafaros reflectantes.