Noticias

A Deputación de Pontevedra organizará por vez primeira o Día Mundial das Cidades na súa aposta pola sustentabilidade e a transición ecolóxica

A celebración consistirá nunha andaina simultánea o 30 de outubro, ás 12:00 horas por Vigo e Pontevedra. "Trátase dunha oportunidade para reflexionar sobre o noso futuro urbano común e construír cidades máis sostibles", asegurou a presidenta


25 outubro 2019
Día Mundial das Cidades

A presidenta da Deputación, Carmela Silva, adiantou que o vindeiro mércores, 30 de outubro, a institución provincial organizará por vez primeira o Día Mundial das Cidades, que a ONU conmemora desde o 2013 cada 31 de outubro e que este ano se centra en "Mellor cidade, mellor vida. Solucións innovadoras e unha mellor vida para as futuras xeracións". Así, a Deputación no marco dos eixes do Goberno provincial relacionados co desenvolvemento sustentable e a aposta pola transición ecolóxica ten prevista unha andaina simultánea o mércores 30 de outubro, ás 12:00 horas por Pontevedra e Vigo. "Trátase dunha oportunidade para reflexionar sobre o noso futuro urbano común e construír cidades máis sostibles", asegurou Carmela Silva.

A celebración impulsada pola Deputación de Pontevedra adiantarase ao 30 de outubro, porque "o 31 é o Día do Ensino e queremos que participen os centros educativos na iniciativa, xa que cremos que a educación é a ferramenta con maior capacidade de transformar o pensamento", explicou a presidenta. Deste xeito, a andaina simultánea (na que participarán centros educativos pero tamén está aberta á cidadanía en xeral) terá lugar, ás 12:00 horas, e nela "imos camiñar por Pontevedra e Vigo, coñecendo os lugares máis representativos das cidades, acompañadas e acompañadas dunha ou dun guía que dará a coñecer a nosa historia e a evolución que experimentaron as cidades", informou Silva. 

Así, en Vigo o percorrido comezará na confluencia de Urzáiz e Príncipe e percorrerá Príncipe, a Porta do Sol, a praza da Princesa, da Constitución, a rúa dos Cesteiros, a praza de Almeida, a praza da Pedra, a rúa Real e a praza da Igrexa.

Pola súa banda, en Pontevedra realizarase un percorrido circular con inicio e fin no Pazo da Deputación. Desde o Pazo camiñarase por Montero Ríos ata a praza de España, avenida de Santa María, praza Alonso de Fonseca, rúa Isabel II, rúa Princesa, praza de Curros Enríquez, rúa dos Soportais, praza da Ferrería, praza de Ourense, praza da Peregrina, Oliva, marqués de Riestra, rúa Enrique Labarta, xardíns de Vicente ata chegar ao Pazo provincial.

Segundo explicou Carmela Silva "máis da metade da poboación mundial vive en cidades e agárdase que esta cifra aumente ata o 68 % para 2050". Por iso, segundo a Nova Axenda Urbana de Nacións Unidas –e en palabras da presidenta provincial–, "hai que pensar moito, debater, e traballar para deseñar unha urbanización sustentable, cousa que nesta provincia xa é moi coñecida e recoñecida xa que temos moitas cidades, vilas e pobos que están a apostar para converter as súas contornas en espazos máis amables".

Tamén recordou a presidenta que a urbanización "pode traer varios desafíos de sustentabilidade relacionados coa vivenda, o medio ambiente, o cambio climático, as infraestruturas, os servizos básicos, a seguridade alimentaria, a saúde, a educación, o traballo decente, a seguridade e os recursos naturais. Pero tamén pode ser esencial para o desenvolvemento sustentable".