Noticias

A Deputación contará co Concello de Soutomaior para definir os usos do castelo

Carmela Silva asegura o seu compromiso para urbanizar a EP-2908 ao seu paso polo novo instituto de educación secundaria


18 xan 2016
Carmela Silva e Agustín Reguera
Carmela Silva e Agustín Reguera

A presidenta da Deputación de Pontevedra, Carmela Silva, asegurou hoxe, na súa xuntanza co alcalde Agustín Reguera, que a institución contará co Concello para definir os usos do castelo de Soutomaior.

Silva realizou hoxe a súa primeira visita oficial ao Concello de Soutomaior, onde foi recibida polo seu alcalde, Agustín Reguera, que se mostrou "moi satisfeito" por esta visita, coa que a presidenta manifestou que "quero coñecer de primeira man as necesidades de cada concello da provincia".

De feito o alcalde formuloulle dúas reclamacións á presidenta da Deputación que recibiron o compromiso de Carmela Silva. En primeiro lugar, a urbanización dun tramo de trescentos metros da EP-2809 ao seu paso polo novo instituto de ensinanza secundaria de Soutomaior. A presidenta comprometeuse a levalo adiante ao recoñecer que era unha necesidade para os escolares pola seguridade destes e dos vehículos que circulan por esta estrada.

A outra reclamación do alcalde foi sobre o castelo de Soutomaior. A este respecto Carmela Silva indicou que a redacción do "plan de usos" do castelo foi contratado o pasado mes de decembro e que, con toda probabilidade, a finais de febreiro estará listo para o seu envío ao Concello. "Remitiremos ao Concello as liñas mestras do plan de usos para que poidan achegar as súas ideas ao respecto". Silva recoñeceu que o castelo ten que servir como un alicerce para o municipio e un atractivo turístico moi importante.

A redacción deste estudo de usos e viabilidade contempla os castelos de Soutomaior e Sobroso; saíu a concurso en decembro por un importe de máis de 21.000 euros e contempla a redacción do estudo de usos e de viabilidade dos espazos actuais de ambos os castelos e as propostas de intervención, tanto para a súa conservación coma para o seu uso turístico.

Por outra banda, a presidenta informou o alcalde do novo Plan Concellos, polo que o Concello de Soutomaior recibirá ao longo de 2016 a cantidade de 474.169 euros, un 18,6 % máis do que percibiu o ano pasado. Silva recordou que, ademais desta liña de axudas, os concellos continuarán recibindo outra serie de subvencións para escolas musicais, deportes ou igualdade.