Noticias

A Deputación de Pontevedra dá un paso máis na posta en marcha de Depotermal 2020

Carmela Silva: "Con esta iniciativa xeramos economía, mantemento de emprego e, o máis importante, facilitamos o turismo de saúde"


08 novembro 2019
Depotermal

A Deputación de Pontevedra acaba de aprobar, en Xunta de Goberno, o expediente de contratación para a adxudicación, mediante procedemento aberto, do servizo de xestión, desenvolvemento e execución do programa de termalismo social Depotermal 2020. Este ano, a institución provincial aumenta o investimento destinado a esta iniciativa ata un total de 126.667,84 euros para facilitarlle ás veciñas e veciños da provincia o acceso a actividades de ocio saudable e envellecemento satisfactorio. "Con Depotermal xeramos economía, mantemento de emprego e o máis importante, facilitamos o turismo de saúde", enxalzou a presidenta da Deputación, Carmela Silva.

Neste eido, Depotermal facilita o acceso ao turismo de saúde ao tempo que serve como plan dinamizador da economía da provincia, impulsando a creación e o mantemento dos postos de traballo no sector turístico durante os períodos de menor actividade. Ademais, o programa de termalismo da Deputación de Pontevedra busca fomentar o envellecemento activo e mellorar a calidade de vida, establecendo novas relacións sociais e favorecendo a participación en actividades que melloren o seu estado anímico. Deste xeito, impúlsanse os movementos de participación e cooperación social que promovan espazos de encontro e intercambio de experiencias co fin de evitar o illamento e as situacións de soidade que poidan levar á vulnerabilidade.

En concreto, esta edición de Depotermal oferta dous programas termais cun total de 4.434 prazas: 1.248 para a modalidade de asistencia diaria e 3.186 para a modalidade con pernoita. Depotermal 2020 está dirixido a persoas empadroadas na provincia nadas antes do 1 de xaneiro de 1970, ou aquelas que nacendo con posterioridade son pensionistas, teñen un grao de discapacidade igual ou superior ao 65 % ou precisan dun respiro familiar.

Audios

  • Audio