Noticias

A Deputación de Pontevedra súmase ao Día Mundial do Alzheimer e revalida o seu compromiso coas asociacións de persoas afectadas e as súas familias

Esata enfermidade neurodexenerativa aféctalles a máis de 20.000 persoas na provincia de Pontevedra e 70.500 en toda Galicia


20 setembro 2019
Día Mundial do Alzheimer

Ao abeiro do Día Mundial do Alzheimer, a Deputación de Pontevedra súmase este sábado ás accións que se desenvolven para dotar de visibilidade a enfermidade neurodexenerativa que, segundo datos da Federación Alzheimer Galicia (FAGAL), afecta a máis de 20.000 persoas tan só na provincia de Pontevedra e a un total de 70.500 en toda Galicia.

Para a institución é fundamental sumarse a estas iniciativas que teñen como obxectivo concienciar a cidadanía, sensibilizar a sociedade sobre doenzas coma o Alzheimer e manifestarlles todo o seu apoio ás persoas que padecen a enfermidade e ás súas familias, posto que se trata dun mal que tamén lles afecta de xeito significativo ás persoas achegadas de quen o padece. Deste xeito, segundo o informe "Impacto Social de la enfermedad de Alzheimer y otras demencias" publicado en setembro de 2017, cada ano detéctanse uns 750 novos casos na provincia, a maioría deles de persoas de máis de 60 anos.

A Deputación mantén un total compromiso na loita contra as enfermidades neurodexenerativas en xeral e co Alzheimer en particular, desenvolvendo propostas que favorecen o envellecemento activo, como "Depo en marcha". Así mesmo, a institución provincial colabora con organizacións como a Asociación de Familiares de Enfermos de Alzheimer y Otras Demencias de Pontevedra (AFAPO), co proxecto "Terapias no farmacológicas en pacientes con demencia", ou coa Asociación de Familiares de Personas Enfermas de Alzheimer del Morrazo (AFAMO), para levar a cabo un proxecto de atención integral dedicado á xente que padece esta doenza.

Con todo, o Alzheimer é a máis común das doenzas neurodexenerativas e representa un 70 % de todos os casos. Ademais, a demencia afecta a 50 millóns de persoas no mundo, aínda que cada ano se rexistran en torno a 10 millóns de novos casos. Galicia é unha das rexións máis afectadas polo Alzheimer de toda a Unión Europea por efecto do alto índice de avellentamento da súa poboación, feito que pode implicar unha elevación da súa incidencia, posto que a idade é o maior factor de risco á hora de padecelo.