Noticias

A Deputación impulsa a aceleradora de empresas dentro do proxecto TurisTic

A presidenta Carmela Silva destaca a importancia da adaptación do sector turístico da provincia ás novas tecnoloxías da comunicación


05 xullo 2018
Presentación do TurisTic

A presidenta da Deputación de Pontevedra, Carmela Silva, deu a coñecer hoxe a posta en marcha dunha aceleradora de empresas dentro do proxecto TurisTic como unha iniciativa pioneira para a adaptación das empresas do sector turístico provincial ás novas tecnoloxías da comunicación. Silva referiuse a que esta aceleradora estará a disposición de cinco empresas do sector na provincia, "cando na comunidade andaluza con nove millóns de habitantes púxose en marcha unha igual para nove empresas. Nós con unha provincia de 900.000 habitantes poñemos en marcha unha aceleradora igual para cinco empresas", recalcou.

Silva resaltou que "imos poñer en marcha de forma inmediata este programa de aceleradora de empresas do sector turístico que busca mellorar a adaptación do sector turístico ás novas tecnoloxías. Este proxecto está enmarcado no servizo SmartPeme e está incluído no Plan estratéxico de turismo". A presidenta da Deputación incidiu en que este proxecto vai dirixido a persoas emprendedoras, empresarias e empresarios, persoas autónomas e profesionais e pemes da nosa provincia con interese en dar un forte impulso ao seu negocio turístico. "O obxectivo é promover a innovación no sector do turismo e o asentamento do talento e da creatividade na nosa provincia", destacou.

A presidenta da Deputación salientou que esta aceleradora vai dispor dun programa de monitorización de cada un dos cinco proxectos; un asesor persoal do sector turístico que fará o seguimento e a dinamización; e formación en grupo especializada. "Este proxecto que vai ser piloto nos permitirá facer un seguimento e control para logo podelo facer extensivo a todos aqueles que queiran apostar dentro do sector turístico polas novas tecnoloxías como dinamizador do seu negocio na provincia", recalcou Carmela Silva.

As empresas ou profesionais interesados nesta aceleradora poden anotarse, desde a páxina web de SmartPeme, a partir do próximo luns e ao longo da semana. Todas as actuacións do programa desenvolveranse despois entre o 16 de xullo e o 19 de outubro. Para Silva o sector turístico da provincia é dos máis importantes e destacou que hai máis de 10.000 empresas dedicadas ao turismo, o que representa o 34 % do sector en Galicia. "Pódese dicir que practicamente o 13 % das empresas da provincia pertencen ao sector turístico con menos de dez traballadoras e traballadores con pouca aposta polas novas tecnoloxías", concluíu.

Visitas ao castelo de Soutomaior desde a estrea da musealización

Falando do sector turístico, Carmela Silva, mostrou a súa ledicia polos datos de visitas que arraxa o castelo de Soutomaior desde a súa apertura unha vez feita a musealización. "En este mes e medio o teñen visitado 7.661 persoas o cal é unha verdadeira sorpresa. Máis de sete mil persoas visitando a musealización en mes e medio nos congratula porque vemos que a nosa aposta polo proxecto foi un verdadeiro acerto".

Estas 7.661 persoas só visitaron a musealización do castelo sen contar cos xardíns. "deste total de visitas 1.710 acolléronse a tarifas reducidas, ben porque ían en grupos de máis de dez persoas ou ben porque pertencen a colectivos que poden solicitar a tarifa reducida. Pero o máis importante é que foron 1.043 escolares que asistiron gratis á musealización", concluíu Silva.

De feito incidiu que xa hai anuncio de moitos grupos de China, Portugal ou Reino Unido "que van visitar nos próximos meses o castelo de Soutomaior o que demostra que estamos a internacionalizar o castelo o cal tamén nos satisfai moito", destacou a presidenta.