Noticias

A Deputación incrementa ata o 40 % a súa cofinanciación dos Grupos de Emerxencia Supramunicipais na provincia

Con este novo convenio entre as deputacións, Xunta e Fegamp, que se asinará o 26 de decembro, conséguese rebaixar en 12,5 puntos os custos que tiñan que asumir os concellos


21 decembro 2018
Carmela Silva

A presidenta da Deputación de Pontevedra, Carmela Silva, anunciou hoxe as novidades do convenio de colaboración entre as deputacións galegas, a Xunta, e a FEGAMP en materia de emerxencias e prevención e defensa contra incendios forestais para o desenvolvemento dos Grupos de Emerxencia Supramunicipais (GES) que se asinará o 26 de decembro e que a Deputación levará a pleno o día 28. Co novo convenio, que estará vixente ata decembro do 2021, as deputacións incrementan as súas aportacións ao cofinanciamento dos GES ata o 40 %, a Xunta de Galicia rebaixa a súa ata o 52,5 % e os concellos ata o
7,5 %; deste xeito, increméntase o gasto para a Deputación de Pontevedra e redúcense os custos que teñen que asumir os concellos da provincia.

Carmela Silva amosou a súa satisfacción xa que "tras meses de múltiples reunións, de encontros e de reflexións e coa xenerosidade das catro deputacións galegas, por fin puidemos acadar o noso obxectivo que non era outro que modificar o financiamento dos GES co obxectivo de minimizar o impacto económico que estes grupos significaban para os concellos. Coa a nosa aposta conseguimos que os concellos rebaixen a súa aportación en 12,5 puntos".

No anterior convenio, a Xunta de Galicia asumía con cargo a fondos propios o 60 % dos gastos de persoal e o 40 % repartíase a partes iguais entre as deputacións e os concellos sede dos GES. Ademais, tamén había uns gastos de funcionamento valorados en 10.000 euros e asumidos pola Xunta de Galicia que coas novas medidas impulsadas pola Deputación ascenderán a 30.000 euros e pasarán a ser cofinanciados por Xunta, Deputación e concellos.

Os GES son grupos supramunicipais integrados, con carácter xeral, por 12 efectivos que complementan a atención ás emerxencias, extinción de incendios forestais e prevención. Máis polo miúdo a provincia de Pontevedra conta coas zonas do Val Miñor, a do Baixo Miño, a de Valga, a de Ponteareas e a de Sanxenxo; e as subzonas de Tabeirós e Terra de Montes e a de Deza.