A Deputación pon en marcha a segunda edición da Facultade Ágora, un “laboratorio de I+D+I do espazo público” con actividades prácticas e descentralizadas pola provincia

Haberá ‘Obradoiros Ágora’ en A Estrada, Tomiño, Vilagarcía e Ponteareas destinados a persoal político e técnico dos concellos, nos que se debaterán proxectos e solucións construtivas

23/05/2022

Facultade Ágora

A Deputación de Pontevedra, a través do departamento de Mobilidade e Espazo Público, vai poñer en marcha a segunda edición da Facultade Ágora para formar ás persoas políticas e técnicas dos concellos da provincia sobre como recuperar o espazo público con calidade. Logo do éxito do anterior curso esta nova cita ten dúas novidades principais: as actividades serán moito máis prácticas e estarán espalladas por diferentes concellos da provincia.

Todos os cambios foron explicados hoxe nunha presentación na que estivo a presidenta Carmela Silva, o deputado de Moblidade e Espazo Público Uxío Benítez, a coordinadora técnica da Rede de Cidades que Camiñan Ana Montalbán, e o coordinador de contidos da Facultade Fernando Nebot. Asistiron ao evento representantes dos colexios oficiais de Arquitectos, de Arquitectos Técnicos, e do colexio de Enxeñeiros de Camiños de Galicia, ademais do director xeral de Protección Cidadá do Concello de Pontevedra Daniel Macenlle.

O deputado Uxío Benítez explicou que a intención da Deputación é que a Facultade Ágora sexa “un laboratorio de I+D+i do espazo público” no que de maneira “humilde pero innovadora” se acheguen diferentes visión de como se deben deseñar vilas e cidades para mellorar a calidade de vida da cidadanía. “A Facultade é unha iniciativa moi necesaria e queremos dar un salto, un novo impulso cara a algo diferente, un espazo de formación con tres premisas: máis presencialidade, máis práctica e máis descentralización”, subliñou.

A primeira das actividades que se porá en marcha, apuntou Benítez, será o curso básico para obter o título de ‘Persoal técnico Ágora’, destinado a persoas –principalmente dos concellos Ágora- que non puideron matricularse e examinarse na primeira convocatoria. Será exclusivamente en liña e a inscrición comezará este mércores e pechará a finais de xuño en redeagora.gal.

A segunda iniciativa e principal novidade deste ano serán os ‘Obradoiros Ágora’, eventos dun día de traballo con visitas guiadas, nos que as persoas matriculadas deberán aplicar os conceptos teóricos adquiridos na primeira edición en localidades concretas nas que se teñen executado obras de recuperación do espazo público. Estes obradoiros contarán ademais coa figura dun ‘observador Ágora’, persoal docente da primeira edición que se achegará á localidade para escoitar e formular propostas ademais de facer un informe externo sobre o tratado na xornada. O obxectivo é analizar e debater de xeito participativo.

Os obradoiros serán o 16 de xuño en A Estrada, con Marius Navazo; o 30 de xuño en Tomiño, con Marius Porto; o 8 de setembro en Vilagarcía con Rocío Plasencia; e o 29 de setembro en Ponteareas con Paula Teles. A inscrición tamén se abrirá pasado mañá mércores e permanecerá aberta ata unha semana antes da celebración de cada evento. Haberá 50 prazas dispoñibles e a Deputación facilitará o transporte dende Pontevedra a cada localidade.

Por outra parte, terán lugar despois do verán as ‘Conversas Ágora’, foros de diálogo sobre o espazo público que contará con persoeiros de referencia e alto nivel internacional (entre elas a socióloga Saskia Sassen, por exemplo). Como punto de inicio as conversas arrancarán co diálogo entre o urbanista José Fariña e a socióloga María Ángeles Durán, nun acto que servirá tamén para a presentación do libro sobre a primeira edición da Facultade Ágora, con resumos e artigos de todo o persoal docente.

Por último, dentro da Facultade Ágora 2022 haberá tamén iniciativas para público específico, como ‘Poli Ágora’ (20 de outubro), que pretende ser unha actividade formativa destinada a axentes de policía local que estará coordinada por Daniel Macenlle e impartida por persoal de corpos locais. O obxectivo é concienciar e aprender conceptos de maneira interactiva sobre como a Policía Local debe ser o primeiro axente á hora de defender o espazo público recuperado, xa ben en relación a temáticas como a prevención de accidentes, a redución da velocidade ou o uso do espazo público por parte dos vehículos a motor de maneira “espúrea”.

Carmela Silva: “Unha idea clara de transformación da provincia”

“Fai sete anos –asegurou a presidenta da Deputación de Pontevedra, Carmela Silva, na presentación da Facultade- un novo goberno entraba na Deputación de Pontevedra cunha idea clara de transformación, de entender que a política é a ferramenta que ten a cidadanía para mellorar a súa vida. E isto ten unha enorme carga de profundidade porque obriga a que responsables públicos deseñemos o territorio que queremos construír, que sempre ten que ser cunha mirada transversal e global”.

Referiuse a presidenta á necesidade de construír vilas, pobos, cidades para as persoas, as “grandes esquecidas que agora forman parte prioritaria do noso modelo”, e dende a participación democrática, “escoitando o talento, o coñecemento, a intelixencia, que está nas e nos profesionais, de pluralidade de áreas, e tamén na cidadanía, que ten que ser copartícipe das transformacións”.

A presidenta recordou que ao longo destes  sete anos de “transformacións transversais os resultados son impresionantes”. Mudáronse as infraestruturas provinciais pero tamén os concellos apostaron por “construír espazos de vida” con ducias de millóns de euros procedentes do Plan Concellos e de proxectos extraordinarios como os Plans de Reequilibrio, DepoRemse ou ReacPon que encheron de “boas prácticas moitos concellos da provincia”.

Tamén incluíu aquí á Facultade Ágora, cuxa primeira edición “foi todo un éxito”,  porque “para transformar o espazo público, para camiñar cara a excelencia, para converternos nun exemplo, é preciso aproveitar a intelixencia, o coñecemento, reflexión, análise, innovación de persoas procedentes dunha enorme pluralidade de profesións”. Ademais fixo especial fincapé no numeroso grupo de mulleres conferenciantes, fundamentais para “transformar realmente xa que se non se conta con nós, que somos a metade do mundo, ese cambio sería imposible de facer”.

Pola súa banda, a secretaria técnica da Rede de Cidades que Camiñan, entidade colaboradora da Deputación a través da que se pon en práctica a Facultade Ágora manifestou o seu agradecemento pola “confianza reiterada na rede e contar coa equipa para seguir compartindo un espazo de coñecemento e aprendizaxe colaborativa”. Montalbán sinalou que neste ano a actividade  ‘estrela’ van ser os obradoiros, subliñando que nas facultades cando máis se aprende é cando se visitan os proxectos in situ e se achega ao detalle construtivo. “Imos afondar en cuestións que na primeira edición quedaron no aire. Cuestións como por que hai beirarrúas, por que se prefiren espazos e plataformas compartidas, porque hai bordiños, por que formigón corrido, por que unha iluminación específica... (...) Haberá un equilibrio entre a parte conceptual e a práctica”, subliñou.

Finalmente, o coordinador de contidos Fernando Nebot destacou que os obxectivos dos obradoiros serán tratar catro aspectos básicos: o espazo público liberado, a xestión dos fluxos de mobilidade, o deseño dos espazos públicos e os seus equipamentos necesarios. O asesor de mobilidade subliñou que os obradoiros serán unha realidade grazas a que “o que case era utópico hai uns anos xa se está a materializar na provincia... polo que se a utopía xa está aquí haberá que buscar novos retos”.

Galerias de imaxes