Noticias

A Deputación presenta o novo cómic do alumnado do garaxe hermético

Será o venres 8 de febreiro ás 20 horas no arquivo provincial e contará coa presenza das 25 autoras e autores do libro


05 febreiro 2019
Portada Intraterra

‘Intraterra' é a décima publicación da escola profesional de banda deseñada e ilustración O Garaxe Hermético e a quinta que edita a Editorial da Deputación, e presentarase publicamente o venres 8 de febreiro ás 20 h no arquivo provincial. Trátase da primeira vez que o alumnado, neste caso 25 autoras e autores, utilizan o sistema americano e xaponés de traballar conxuntamente na mesa historia e coa mesma estética –nas anteriores edicións, o libro recollía historias individuais-. "Con esta publicación, a Deputación contribúe a visibilizar e poñer en valor o talento das persoas que traballan en banda deseñada, un sector no que somos unha potencia a nivel galego e que non sempre se lle dá a importancia que merece" asegura Xosé Leal. O deputado asegura ademais que a edición continuada dos traballos do alumnado da escola pontevedresa a través da Editorial da Deputación "é un apoio necesario e merecido a todo un esforzo de dignificación e profesionalización da banda deseñada, que esperamos que vaia collendo cada vez máis forza entre as editoriais comerciais, por ser un campo no que cada vez hai máis demanda entre o público."

Pola súa banda, o director de O Garaxe Hermético, Kiko da Silva, salienta "o apoio da Deputación ao respecto da produción de banda deseñada en galego e a axuda aos autores noveis". Neste sentido, aproveita para indicar que "agás o apoio das Deputacións de Pontevedra e a da Coruña, non existen ningún tipo de axudas para a xente nova que fai BD" e asegura que "para a Xunta e para Agadic nin existimos, a pesar de que a banda deseñada é un dos sectores con máis proxección fóra de Galicia". Kiko da Silva valora moi positivamente que a Editorial da Deputación de Pontevedra "lle dea a oportunidade a rapazas e rapaces que se están formando de ter obra publicada, porque dunha banda lles permite coñecer e familiarizarse con todo o proceso, e por outra lles permite chegar ao mercado profesional con traballos propios xa na rúa."

‘Intraterra' relata a historia da comunidade do BÚNKER 0018 situado na devastada Tundra Rusa que vive en conmoción por un asasinato. A inspectora COLLINS, do corpo de policía, é destinada alí para atopar ao culpable e atópase cun lugar onde parecen reinar a prosperidade e a conduta pacífica, pero que resulta ser un refuxio para o crime, en mans dos seus dirixentes.

As autoras e autores que participan neste libro son, tal e como aparecen nos créditos: Ana Pumares, Atenea Agular Ferradás, Ángel Verísimo Pazos, Bea Bendaña Bermejo, Carlos Fandiño Soto, Damián Gómez Figueiras, Daniel Zamudio, Fenando Mármol Fernández-Ayala, Hugo Feal Permuy, Iago Fernández Falcón, Jacobo Troitiño Lubiáns, Laura da Silva Irago, Lorena Abilleira Acevedo, Luz Fraga Constenla, Marcos Pérez Rial, Clara Muñíz Cameán, Olalla González Barja, Pablo LLoveres Tembrás, Ramón Fernández Ameijeiras, Rosa Magdalena Fernández, Sabela Domínguez Costa, Samuel López Cabana, Tere García Fernández, Werónica Hanczyc, e Yaiza Martínez Piñeiro.