Noticias

A Deputación realiza obras de estabilización na estrada das Sinas en Vilanova de Arousa pola vía de urxencia

O deputado de Mobilidade Uxío Benítez deixa aberta a porta a realizar unha mellora global da vía seguindo os trámites ordinarios


15 marzo 2019
As Sinas

A Deputación de Pontevedra está a realizar obras na estrada provincial das Sinas no concello de Vilanova para solucionar, pola vía de urxencia, un problema de estabilidade e de posible desprazamento da base da estrada e do saneamento municipal. Así o indicou hoxe o deputado de Mobilidade Uxío Benítez, quen subliña que a actuación foi solicitada polo Goberno local para un treito puntual no que as mareas vivas fixeron que o noiro de contención da vía estivese en risco de caída e que as canalizacións de fecais do Concello tivesen risco de rotura.

Benítez sinala que esta actuación de emerxencia foi atendida polo Servizo de Mobilidade ante o informe da Policía Local coa máxima celeridade. Fixéronse para iso os trámites oportunos ante o servizo de Costas solicitando a autorización para a obra e iniciouse esta pola vía de urxencia cos medios propios da área de Conservación Viaria. "Non imos entrar en polémicas estériles co alcalde. Actúase no treito no que se están a realizar os traballos por unha cuestión de necesidade urxente pedida de forma expresa polo Concello", explica o nacionalista.

Queda aberta, en calquera caso, a posibilidade de realizar a medio prazo unha actuación global no conxunto da vía por medio dun procedemento ordinario de tramitación e non de urxencia, xa ben cun convenio co Concello de Vilanova ou a través doutras fórmulas, pero descartando absolutamente aproveitar que as máquinas están no lugar a día de hoxe para realizar melloras sen proxecto e sen autorizacións sectoriais.

Neste sentid0, Benítez explica que na solicitude de autorización da obra da Deputación ao servizo de Costas pedíase a construción do muro de contención para evitar a caída da estrada e tamén a construción dun novo sobreancho de tres metros para evitar a chegada do mar á base da plataforma. A proposta concreta de tres metros baseábase tamén en deixar espazo gañado para construír un novo paseo litoral e continuar o muro no resto da vía.

O informe de Costas deu vía libre ao muro e ao sobreancho, pero limitando a ocupación de terreos a dous metros de largo dende a liña branca do borde de carril. Esta limitación, que previsiblemente se repetirá se hai novos requirimentos para novas obras, condiciona de facto futuras actuacións, xa que ese espazo non é suficiente para desenvolver un proxecto que cumpra os criterios de mobilidade provinciais: dos dous metros autorizados necesítanse 0,50 metros para a beiravía e alomenos 0,30 para a instalación dunha varanda de protección, o que deixaría apenas 1,20 para construír un paseo que non cumpre sequera a Lei de Accesibilidade -que esixe 1,8 metros libres de obstáculos no deseño de novos itinerarios peonís-.