Noticias

A Deputación de Pontevedra súmase aos actos conmemorativos do Día Nacional das Linguas de Signos

O Pazo provincial tinguirase de cor turquesa esta noite e a de mañá, e este venres acollerá a entrega de premios do concurso Xoga coas Manciñas


13 xuño 2019
Lingua de Signos

Con motivo da celebración do Día Nacional das Linguas de Signos, que se conmemora este venres 14 de xuño, a Deputación de Pontevedra súmase a distintas iniciativas para chamar a atención do conxunto da sociedade para coas persoas xordas e xordocegas. De feito, esta noite e a de mañá, o Pazo provincial tinguirase de cor turquesa co obxectivo de visibilizar as linguas de signos e sensibilizar sobre a realidade das persoas xordas e xordocegas.

Así mesmo, mañá venres, o salón de plenos do Pazo provincial de Pontevedra acollerá a entrega de premios da segunda edición do concurso provincial Xoga coas Manciñas, un certame para sensibilizar sobre a lingua de signos e a comunidade xorda ao alumnado da provincia de educación infantil e primaria. As nenas e nenos participantes, en equipos, gravaron un vídeo, en lingua de signos, dun conto, canción ou poema dunha autora ou autor galega/o. Trátase dunha iniciativa impulsada por Xoga, a asociación de iniciativa social sen ánimo de lucro cuxa misión é defender os dereitos fundamentais e así lograr mellorar a calidade de vida e benestar das persoas con diversidade funcional auditiva de Galicia.

Segundo datos da OMS, a xordeira afecta a máis do 5 % da poboación mundial, é dicir, a aproximadamente 360 millóns de persoas en todo o mundo, dos que 32 millóns son nenas e nenos. En España, a xordeira afecta arredor dun millón de persoas (das que case o 72 % teñen máis de 65 anos). No que respecta á provincia de Pontevedra, máis de 16.000 persoas viven con algún tipo de problema sensorial, das que a metade, unhas 8.000 persoas, contan cun problema auditivo.