Noticias

A Banda de Música de Cerdedo e Os Catro Ventos protagonizarán o Concerto Solidario da Lama

Farase entre o público unha recollida de alimentos non perecedeiros e o espectáculo terá lugar este domingo, a partir das 19 horas, no salón de actos do colexio da Lama. Para rematar haberá unha chocolatada con rosca gratis para os asistentes


28 decembro 2019
A Lama
Concello da Lama

A Banda de Música de Cerdedo e a Banda de Gaitas Os Catro Ventos protagonizarán o Concerto Solidario de Nadal organizado polo Concello da Lama e que terá lugar o vindeiro domingo 29 de decembro no salón de actos do colexio da Lama, a partir das 19 horas.

Os asistentes ao concerto deberán entregar, a modo de entrada, alomenos un quilo de alimentos non perecedeiros que serán repartidos posteriormente polos Servizos Sociais do Concello da Lama entre as familias en situación de emerxencia social e que residen no municipio. Ao remate do concerto, os asistentes poderán degustar unha gran chocolatada con rosca de xeito gratuíto.

O Concerto Solidario de Nadal, que comezará sobre as 19 horas, alternará varios estilos de música protagonizados pola Banda de Música de Cerdedo que interpretará varias pezas típicas do Nadal e outras populares, mentras que Os Catro Ventos apostarán máis por composicións folclóricas que irán intercalando con colaboracións musicais de diversos artistas convidados para este espectáculo altruísta e solidario.

O alcalde da Lama, Jorge Canda, agradeceu aos músicos a súa participación neste evento e salientou "o enorme sentido solidario que posúen as persoas relacionadas co mundo a música en xeral que cando teñen que significarse ante un compromiso solidario como este son os primeiro en dar un paso adiante. Desde o Concello queremos agradecerlles o seu compromiso social coas persoas máis desfavorecidas que serán as destinatarias da recadación de alimentos non perecedeiros que se levará a cabo con esta iniciativa. O que se recade será distribuído polo persoal profesional adscrito ao departamento de Servizos Sociais do Concello que coñecen perfectamente a realidade de cada familia necesitada do noso municipio e cara eles irán estas axudas", indicou o rexedor municipal.