Noticias

A repulsa do crime machista de Valga e o recordo de María José centran a acción de Violencia zero en Barro

A deputada e técnicas de Igualdade sumáronse ao minuto de silencio convocado polo Concello previo á acción artística na que participaron máis de 150 rapazas e rapaces


11 marzo 2019
Violencia Zero en Barro

A deputada provincial, Isaura Abelairas, xunto a máis de 150 alumnas, alumnos e docentes do IES de Barro e do CEIP Amor Ruibal, sumáronse esta mañá ao minuto de silencio convocado polo Concello para amosar a súa condolencia e a súa repulsa do asasinato machista que terminou coa vida de María José este domingo en Valga. Despois, na Aula de Música de Barro realizouse a acción artística desta cuarta edición do programa da Deputación de Pontevedra "Mulleres en acción. Violencia zero", que tivo como protagonista á artista muxiá Teresa Búa. 

Máis polo miúdo, máis de 60 nenas e nenos de 5.º e 6.º de primaria do CEIP Amor Ruibal e preto dun centenar de mozas e mozos do IES de Barro participaron nesta iniciativa promovida pola institución provincial cuxo obxectivo é darlle visibilidade á loita contra as violencias machistas, así como dar a coñecer o traballo de novas artistas que están a traballar a prol da igualdade. Neste ocasión, a intervención artística correu a cargo de Teresa Búa coa peza titulada P-persoa Ola 3, unha peza autobiográfica, cunha visión antropolóxica e sociolóxica, na que a artista analizou o mundo desde a súa presenza nel ao mesmo tempo que filtrou os paradigmas culturais que lle foron impostos. Así, todo o alumnado foi partícipe dunha performance na que se usaron as saias e os pantalóns como símbolos persoais, políticos e sociais, co fin de deixar a un lado os roles de xénero estipulados e ser capaces de ver as persoas simplemente como persoas, ademais tamén instou a eliminar os prexuízos que xorden da obxectualización dos seres humanos.

A iniciativa de hoxe en Barro foi a novena acción desta cuarta edición de "Mulleres en acción. Violencia zero", que comprende un total de 25 intervencións artísticas en 25 concellos da provincia. Este programa é unha iniciativa da Deputación de Pontevedra, a través da área de Igualdade, para levar accións artísticas a espazos públicos nas que implicar á cidadanía na loita contra as violencias machistas e contra as desigualdades entre homes e mulleres. Ao longo do ano, reúne o traballo de 25 mulleres artistas especialistas en diferentes artes como a pintura, a música, a danza, o teatro, a poesía, o graffiti ou a performance, vinculadas pola vontade de ofrecer, na súa obra, un firme discurso en favor da igualdade e en repulsa da violencia machista.

A vixente cuarta edición comezou o pasado novembro en Vigo e en Pontevedra. En total, serán 25 accións en 25 concellos da provincia: Vigo, Pontevedra, Salceda de Caselas, Ponteareas, Vilaboa, Mos, Ponte Caldelas, Cambados, Vilagarcía de Arousa, Barro, Lalín, O Grove, Silleda, Tomiño, Poio, As Neves, A Illa de Arousa, Baiona, Cangas, A Guarda, Forcarei, Gondomar, Cuntis, Meis e Nigrán. Nas catro edicións que leva este programa téñense realizado 85 accións artísticas e teñen participado máis de 100 artistas.