Noticias

Aberto o prazo de contratación do servizo de formación do proxecto "Depointegra xove"

O proceso de adxudicación, mediante procedemento aberto, manterá aberto o prazo de presentación das ofertas ata o próximo 1 de febreiro


26 decembro 2017
Formación

Ata o próximo 1 de febreiro, as empresas interesadas poderán presentar as súas ofertas para obter o contrato, mediante procedemento aberto, do servizo de formación no marco do proxecto da Deputación de Pontevedra "Depointegra xove". O programa, que conta cun orzamento total de máis de 2,5 millóns de euros, está destinado á integración sostible no mercado de traballo das persoas desempregadas con idades comprendidas entre os 16 e os 30 anos que non participan nos sistemas de educación nin de formación.

"Depointegra xove" tamén ten por obxectivo favorecer a participación das mulleres, das persoas paradas de longa duración e os colectivos en risco de exclusión social, para garantir a inclusión no programa por motivos sociais, formativos, por razóns de xénero ou lugar de residencia. En liñas xerais, as empresas que opten ao contrato para a prestación do servizo de formación de "Depointegra xove" deberán ofertar 27 accións formativas de 17 itinerarios diferentes dirixidos á certificación oficial da súa formación específica e práctica, é dicir, á obtención do certificado de profesionalidade íntegro.

No marco deste proxecto tamén se fixo pública a lista das persoas que se presentaron ao proceso selectivo para as 4 prazas de titoras e titores orientadores para executar o programa "Depointegra xove". Concretamente, recibíronse 65 solicitudes e o primeiro exame levarase a cabo o vindeiro 4 de xaneiro ás 09:00 h nas instalacións do Príncipe Felipe.


Novas relacionadas