Noticias

Adxudicada a obra de mellora do acceso á praia do Muíño da Guarda que conectará os sendeiros marítimo e fluvial

A actuación enmárcanse dentro do proxecto Visit Rio Minho, de preservación medioambiental, cofinanciado ao 75 % polos fondos FEDER


27 setembro 2019
Rio miño transfronteirizo

A Deputación de Pontevedra acaba de adxudicar a obra de mellora do acceso á praia do Muíño da Guarda á empresa Marconsa, S. L. O orzamento de adxudicación foi finalmente de 168.287,34 euros, o que supón un 12,44 % de baixa con respecto á licitación, segundo informou o deputado de Cooperación Transfronteiriza e AECT Rio Minho, Uxío Benítez.

Un total de 16 empresas presentaron ofertas para a execución destas obras de mellora e recuperación do acceso á praia do Muíño da Guarda, que conectará os sendeiros marítimo e fluvial que rematan no areal. A actuación forma parte do proxecto de cooperación europea ‘Visit Rio Miño', de Preservación e Valorización do Río Miño Transfronteirizo, do que a Deputación provincial é socia.

As actuacións permitirán por un lado a recuperación do entorno, preservando e protexendo un espazo de alto valor ecolóxico, e por outro, a mellora da accesibilidade e os servizos da praia para a cidadanía. O proxecto de mellora e recuperación do acceso ao areal inclúe a construción dunha rotonda cunha zona de carga e descarga, a creación dunha parada de bus, a ampliación das entradas ao areal e a rexeneración da praia mediante o recuamento do muro de contención existente.

Estas obras enmárcanse na actividade 4 do proxecto de cooperación europea Visit Rio Minho destinada á mellora e posta en valor da rede de sendeiros verdes transfronteirizos situados a ambas marxes do río Miño, un dos maiores atractivos deste territorio como destino de natureza. Ademais, a praia do Muíño é o areal máis extenso do Baixo Miño, conta con Bandeira Azul desde hai anos e é moi apreciado.

Visit Rio Minho é un proxecto confinanciado nun 75 % polo Fondo Europeo de Desenvolvemento Rexional (FEDER) no marco da convocatoria de axudas do Programa de Cooperación Territorial Interreg V-A España-Portugal (POCTEP) 2014-2020.