Noticias

Arranca a II Aceleradora de Comercio da Deputación con dez empresas da provincia

Desde este luns, 14 de xuño, formaranse durante 4 meses en competitividade, imaxe dixital, canvas, comercio en liña, sustentabilidade, redes sociais e finanzas


10 xuño 2021
Aceleradora de comercio

A comisión técnica encargada da selección de empresas para participar na II Edición do Programa de Aceleración de Empresas do Sector Comercio, que impulsa a Deputación de Pontevedra a través de "SmartPeme", acaba de seleccionar aos proxectos participantes. Son un total de dez empresas dos concellos de Pontevedra (3), Lalín (2), Crecente, Meaño, Silleda, Vigo e Vilagarcía de Arousa que ao longo de catro meses, desde este vindeiro luns 14 de xuño e ata o 15 de outubro, recibirán formación en liña sobre competitividade, imaxe dixital, canvas, comercio en liña, sustentabilidade, redes sociais e finanzas.

Coa participación na aceleradora, as empresas seleccionadas poderán adquirir coñecementos e técnicas para mellorar a planificación e desenvolvemento dos seus proxectos, lanzar as súas tendas en liña, crear as súas propias webs ou mellorar o posicionamento. Tamén serán formadas para poder incrementar as vendas e rentabilidade, afondar na promoción en redes sociais, no márketing dixital e no branding, así como coñecer as técnicas para o estudo de datos estatísticos, establecer mecanismos para diferenciarse da competencia, procurar clientes potenciais e coñecer as ferramentas dispoñibles para impulsar a súa dixitalización.

As firmas seleccionadas de Pontevedra son María de los Ángeles Vázquez, dedicada á venda de roupa de deseño de muller; Mimobooks (de Goretti Cabido), venda de libros acolchados, camisetas e tote bags; e Cibertopia (de Fermín González), que comercializa servizos tecnolóxicos. Pola súa banda de Lalín foron seleccionadas Namaskar (Cristina Barreiro), venda de produtos e preparados herbais; e Mel e Canela (Raquel Fernández), comercio de produtos ecolóxicos e locais a granel. De Crecente participa Trees (Mar Penela), deseña lugares para que estean máis conectados coa natureza; de Meaño Produhostel (Mónica Silva), dedicada á distribución de produtos para a hostalaría e a industria; de Silleda Herbolario BIO (José Alberto López), proxecto de venda de produtos de cosmética bio; de Vigo AK (Antonina Kadyrova), tenda en liña de produtos de marroquinería feita a man; e de Vilagarcía de Arousa Arual Ecology (Laura Carro), marca de roupa sustentable que emprega tecidos ecolóxicos ou reciclados. Todas as empresas foron valoradas polo seu grao de innovación, o seu carácter tecnolóxico, o seu alto potencial de crecemento e o feito de ser proxectos ligados ao comercio en fase temperá de desenvolvemento. Tamén se tivo en conta os obxectivos, visión e os seus valores.

A aceleradora de comercio da Deputación de Pontevedra, que arranca deste xeito a súa segunda edición, ten por obxectivo optimizar a competitividade e eficiencia das empresas a través de formación e asesoramentos específicos. Na súa primeira edición participaron 8 empresas que aproveitaron a aceleradora para crear e-commerce, tendas en liña, redeseñar as súas webs, impulsar a súa presenza en redes sociais, traballar no márketing dixital, optimizar as súas webs, mellorar a súa competitividade empresarial e traballar a imaxe de marca. As primeiras que participaron nesta iniciativa da Deputación foron Comercial Limeres (Pontevedra), Blaurtopías (Vigo), Tipi Fiestas Galicia (Nigrán), Broderie (Ponteareas), Foodies and travellers (Vigo), Infusiónate (Lalín), SS3 Professional (Mos) e Tamerlán (Vigo).