Noticias

As xornadas de formación sobre administración electrónica impulsadas pola Deputación de Pontevedra chegan esta semana a catro novos concellos

A vindeira semana poranse en marcha catro sesións formativas para os equipos de goberno do concellos da Guarda, Salceda de Caselas, Moaña e A Illa de Arousa


17 novembro 2019
Xornadas de formación sobre administración electrónica

A Deputación de Pontevedra leva esta semana as xornadas formativas sobre administración electrónica dirixidas aos equipos dos gobernos a outros catro concellos da provincia. O obxectivo desta programación é dar a coñecer as principais funcionalidades e cambios máis relevantes da plataforma de administración electrónica "Gestiona", da institución provincial, co fin de dar resposta a cada un dos cumprimentos marcados pola Lei 39/2015 e a Lei 40/2015.

En concreto, este luns 18 de novembro a acción formativa terá lugar na Guarda; o martes 19 será a quenda do concello de Salceda de Caselas; o xoves 21 chegan as xornadas a Moaña; e, por último, o venres 22 recibirá a formación o concello da Illa de Arousa. A través das sesións formativas a institución provincial vai dotar de ferramentas e de información sobre a administración electrónica aos novos equipos de goberno. Nelas darase a coñecer os diferentes libros de rexistro de entrada e saída, a utilización do xestor de expedientes, o acceso ás diferentes convocatorias na aplicación de órganos colexiados, activar as sinaturas electrónicas na nube e no móbil, consultar o rexistro e expedientes, visualizar os libros de actas, consultar experiencias ou presentar mocións e preguntas.

En total, este novo plan de formación vai beneficiar a 53 concellos da provincia adheridos ao proxecto de administración electrónica. No que respecta aos 23 concellos de menos de 5.000 habitantes, as accións formativas terán lugar nas dependencias da Deputación os días 27, 28 e 29 de novembro.