Noticias

Cambados acolle en marzo sete novos obradoiros de capacitación tecnolóxica ao abeiro de "SmartPeme"

O programa de asesoramento no ámbito das TIC da Deputación de Pontevedra está destinado ás persoas emprendedoras, autónomas e ás pemes da provincia


04 marzo 2019
SmartPeme Cambados

O Centro ExpoSalnés de Cambados acollerá durante este mes de marzo sete novos obradoiros ao abeiro de "SmartPeme", o programa de capacitación tecnolóxica impulsado pola Deputación de Pontevedra. "SmartPeme" oferta ás persoas emprendedoras e pemes da provincia unha serie de servizos de información, análise, asesoramento, capacitación, demostración, acompañamento e titorización no ámbito das TIC, coa colaboración das asociacións de empresarias e empresarios e de mozas e mozos autónomas. O punto do Centro ExpoSalnés presta asistencia ao empresariado das comarcas do Salnés e Caldas.

O primeiro dos obradoiros será "Como promocionar o teu propio evento en redes sociais", que se desenvolverá o martes día 5 a partir das 19.00h. O xoves desa mesma semana á mesma hora celebrarase "O teu contido efémero: Stories en Facebook e Instagram". O seguinte será o martes 12 de marzo, cando a partir da mesma hora terá lugar o curso "Coñece as tendencias en economía dixital: Deseño 3D e robótica". O cuarto curso será "Bokeh, domina a técnica do desenfoque selectivo", que terá lugar o xoves desa mesma semana, tamén ás 19.00h. O xoves 21, esta vez ás 18.00 horas, Cambados acollerá "Mellora o impacto da túa web grazas a Google Analytics". O obradoiro "Empresas turísticas nas AAPP. Trámites para mellorar a túa presenza en liña" chega o martes 26 ás 17.00h. Por último, o xoves desa mesma semana ás 19.00 horas terá lugar o curso "Emprego de 3D en vídeos corporativos ou promocionais".

A oficina "SmartPeme" de Cambados, no Centro ExpoSalnés, atópase no paseo da Calzada, s/n e as inscricións pódense facer no número de teléfono 886 202 020, no correo electrónico info.smartpeme@depo.es ou a páxina web www.smartpeme.depo.gal.