Noticias

"Camiño (a) Dentro" leva a utopía do Camiño ao centro de Pontevedra nunha acción co alumnado de Belas Artes

A artista Lucía Loren e un grupo de estudantes da facultade escenifican un evocador encontro das rutas xacobeas na praza da Ferrería, dentro do proxecto para por en valor o Camiño Portugués


17 outubro 2019

O proxecto "Camiño (a) Dentro", promovido pola Deputación de Pontevedra coa colaboración da Xunta de Galicia a través de "O Teu Xacobeo", desembarcou este mediodía na praza da Ferrería de Pontevedra da man da artista Lucía Loren e dun grupo de alumnas e alumnos da Facultade de Belas Artes da cidade. A acción, baixo o nome "Utopías do Camiño", evocou o encontro entre as diferentes rutas xacobeas e as emocións que espertan entre as peregrinas e os peregrinos, e simboliza ademais o respecto á natureza e a vontade dun cambio cara o sostible, onde a terra dos camiños individuais fúndese nun camiño común.

A deputada provincial de Cohesión Social, Olga García, mostrou no evento a súa satisfacción polo desenvolvemento de "Camiño (a) Dentro", unha iniciativa que busca pór en valor o Camiño Portugués a través da acción de dez mulleres artistas en diferentes concellos da provincia de Pontevedra. "O Camiño Portugués é o segundo itinerario xacobeo máis transitado. Está en auxe e queremos seguir impulsándoo", explicou, para agradecer ao alumnado da facultade a súa colaboración nesta iniciativa.

A comisaria do Xacobeo 2021, Cecilia Pereira, destacou que "Camiño (a) Dentro" é un "proxecto fermoso, que vincula a arte contemporánea co Camiño, nunha iniciativa feita por mulleres, para mulleres e para a poboación en xeral".

Esta nova acción é a sétima do programa de "Camiño (a) Dentro", que onte fixo escala na Guarda da man de Inherente Teatro e esta fin de semana terá lugar en Nigrán e Tui. Soutomaior porá o peche ás intervencións artísticas do proxecto o día 25 de outubro.

"Camiño (a) Dentro" inclúe desde poesía, música e teatro, ata fotografía, videocreación, ilustración e instalación. A través destas obras búscase afondar na relación entre Camiño e territorio, así como propiciar a interacción entre a veciñanza e as persoas peregrinas e recoñecer o traballo das mulleres no mundo da arte.

O proxecto conta coa participación das artistas Dores Tembrás, Carmen Quinteiro, Ruth Montiel, o grupo Dúas (formado por Sabela Caridad e Marta Figueiredo), María Meijide, Inherente Teatro (integrado por Noelia Blanco, Celina Fernández e Pía Nicoletti), Lucía Loren, Carla Andrade, Nastasia Zürcher e Helen Bertels. A iniciativa está comisariada por Paula Cabaleiro, coordinadora tamén do programa "Mulleres en acción.Violencia zero" da Deputación de Pontevedra.

O Camiño Portugués é a segunda ruta xacobea máis transitada de cantas conducen a Santiago de Compostela, con máis de 67.800 peregrinas e peregrinos en 2018 e en aumento constante nos últimos anos. O Camiño pola Costa, que cruza todo o litoral desde A Guarda ata Redondela, tamén rexistra un progresivo incremento de persoas, con 13.638 en 2018. Así, as dúas rutas vencelladas ao país veciño superan as 81.500 persoas ao ano en tránsito pertencentes a un grande abano de nacionalidades.

(Máis imaxes e información sobre as artistas, accións, datas e lugares nesta ligazón)

Próximas accións

 

Fotos