Noticias

Carmela Silva asegura que "os bos datos do paro rexistrado de maio demostran que o Goberno de Pedro Sánchez está a tomar decisións axeitadas"

A presidenta da Deputación destaca o aumento do número de contribuíntes en máis de 200.000 persoas, "a segunda mellor marca de ocupadas da historia", e que por vez primeira o número de mulleres afiliadas á Seguridade Social supere os 9 millóns


04 xuño 2019
Carmela Silva

A presidenta da Deputación de Pontevedra amosou esta mañá a súa satisfacción polos datos do paro rexistrado do pasado mes de maio que cualificou de "moi positivos". Carmela Silva enxalzou que os resultados, moitos deles históricos, poñen de manifesto que "o Goberno de Pedro Sánchez está a tomar decisións axeitadas. Estase demostrando desde fai un ano que para ter empregos de calidade e con máis dereitos é necesario un goberno progresista como o que temos". "O Goberno do estado, dixo a presidenta provincial, está a facer ben as cousas e a súa toma de decisións amosa que era falso que subir o SMI ía influír negativamente no paro, que tomar decisións para loitar contra a precariedade laboral ía ser negativo para o emprego e que loitar polos dereitos das e dos traballadores ía ter consecuencias negativas. Os resultados están amosando todo o contrario", destacou Carmela Silva.

A presidenta valorou o descenso do paro en máis de 84.000 persoas e que a ocupación aumentara en máis de 200.000, "a segunda mellor marca de persoas ocupadas da historia".  Outro dato histórico ao que fixo referencia a presidencia provincial foi o do número de mulleres contribuíntes á Seguridade Social que, "por primeira vez supera os 9 millóns". Ademais, tamén recordou Silva que "o número total de persoas afiliadas é o segundo máis alto despois de xullo de 2007, cando comezou a crise". Respecto a contratación, a presidenta da Deputación si incidiu en que os contratos indefinidos seguen a estar nunha cifra baixa polo que incidiu na necesidade de seguir a loitar contra a precariedade e a temporalidade do mercado laboral. "Está claro que hai que seguir tomando decisións que permitan incrementar e impulsar o emprego de calidade".

Respecto a Galicia e a provincia de Pontevedra, a presidenta valorou positivamente que o paro tamén se reduciu con respecto ao mes anterior e mesmo mes do ano pasado. En Galicia a redución foi do 3,26 % con respecto a abril e do 8,99 % con respecto ao mesmo mes do ano anterior e no caso de Pontevedra a redución foi do 3,35 % e do 8,14 % respectivamente.

En canto á cobertura das prestacións, que aumenta un 5 % ata chegar ao 59,1 %, a presidenta asegurou que "novamente os datos poñen de manifesto que segue aumentado polo que demóstrase que o Goberno está a atender ás persoas que peor o están pasando".

Audios

  • Audio