Noticias

Carmela Silva comprométese a impulsar liñas de colaboración con AEMPE para promover a actividade empresarial na provincia

Estas liñas de colaboración, tal e como avanzou a presidenta, estarán centradas na formación "adaptada ás demandas do século XXI e ligada ás novas tecnoloxías" e na cooperación


23 setembro 2019
Reunión AEMPE

A presidenta da Deputación de Pontevedra, Carmela Silva, mantivo esta mañá un encontro de traballo coa Xunta Directiva da Asociación de Empresarios da Mediana e Pequena Empresa da provincia de Pontevedra (AEMPE). No transcorrer do encontro, a presidenta amosou a predisposición do goberno da institución provincial para colaborar coa asociación co obxectivo de promover a actividade empresarial na provincia.

Máis polo miúdo, entre as liñas de colaboración acordadas entre a Deputación e AEMPE adiantouse a posta en marcha de actividades de formación dirixidas ás persoas empresarias. "É preciso unha formación adaptada ás demandas do século XXI, ligada á economía e ás novas tecnoloxías", asegurou Carmela Silva. Neste eido, a presidenta aproveitou para recordar que a través de SmartPeme estanse xa a impulsar actividades de formación e asesoramento individualizado en materia de novas tecnoloxías e márketing dixital.

Ademais, a presidenta da Deputación tamén falou na reunión da importancia da cooperación e dos espazos para impulsar proxectos e iniciativas. Ao respecto, Carmela Silva mencionou os viveiros de Barro e de Lalín, o coworking ou o FabLab, "ferramentas todas elas de interese para lanzar proxectos empresariais e novas ideas de negocio".

Finalmente, a presidenta provincial comprometeuse con AEMPE a organizar unha nova reunión de traballo co persoal técnico da Deputación para establecer liñas de actuación concretas para a promoción da actividade empresarial na provincia de Pontevedra.