Noticias

Carmela Silva: "nos medios e innegable que a mirada lila non está presente e iso provoca que a sociedade só mire cun ollo, o da masculinidade"

A presidenta da Deputación falou na Xornada sobre Comunicación, Igualdade e Violencia contra as Mulleres "unha xornada que ten que ser un berro contra esta intolerable invisibilidade"


24 outubro 2019
Xornadas comunicacion

A presidenta da Deputación de Pontevedra, Carmela Silva, puxo hoxe o foco sobre a invisibilidade das mulleres nos medios de comunicación durante a súa intervención na Xornada sobre Comunicación, Igualdade e Violencia contra as Mulleres, organizada pola Universidade de Vigo na Facultade de Ciencias Sociais do campus pontevedrés. Así, Silva foi contundente ao afirmar que "existe un innegable nesgo de xénero nos medios de comunicación, e iso que hai leis que o prohiben". A través desta situación "promóvese a desigualdade de xénero, é a violencia simbólica porque tamén é violencia cando se nos nega, somos más da metade da poboación", afirmou. Por isto, destacou que xornadas como estas deben ser "un berro contra esta invisibilidade intolerable".

Silva puxo enriba da mesa datos que amosan esta realidade. A pesar de que a maioría das persoas tituladas en Ciencias da Comunicación son mulleres (62%), o 75% dos postos de dirección nas 30 empresas máis importantes do sector seguen a estar ocupados por homes. "As mulleres, ademais, sofren máis temporalidade e precariedade no sector, e un exemplo claro é que representan o 63% da poboación desempregada –apuntou a presidenta-. Por tanto, unha sociedade na que as mulleres non estean nos centros de opinión e de poder dos medios de comunicación, é unha sociedade torta, como dicía Montserrat Domínguez. Porque se o 52% da poboación temos tan pouca representatividade nos medios de comunicación, a mirada lila non está presente. É, polo tanto, unha sociedade que só mira cun ollo, o da masculinidade".

A presidenta da Deputación lembrou tamén que as alumnas "lideran a excelencia" na Universidade de Vigo, ao indicar que son mellores en 36 dos 45 graos, aproban 9 de cada 10 créditos e superan aos seus compañeiros en todas as titulacións, incluíndo as que son minoría no alumnado, como enxeñerías. Un dato que, como dixo Silva, contrasta co de que só un 9% de mulleres son consultadas como expertas nas informacións dos medios. O desequilibrio actual preocupa polos seus efectos "na toma de decisións e no tratamento informativo da realidade que vivimos, e particularmente das novas vinculadas ao terrorismo machista ou agresións sexuais", engadiu. "De feito, as vítimas de violencia machista aparecen na maioría dos casos nas páxinas de Sociedade, despois de ler máis de trinta páxinas doutras noticias. É dicir, estamos bastante lonxe de ser a prioridade da comunicación, aínda que levemos 49 mulleres asasinadas este ano", concluíu. 

Engadiu que as mulleres son sempre minoría como protagonistas das informacións nos medios (supoñen un 28% dos suxeitos das noticias), a excepción das relacionadas coa violencia machista. "O 51% das noticias sobre cuestións que teñen que ver coa violencia teñen a mulleres como protagonistas, tristemente –sinalou-. A que é debido? Aos asasinatos machistas, 49 este 2019, máis que en todo o 2018. Aí si somos protagonistas, porque a violencia se exerce sobre nós, as mulleres. Existe a violencia de xénero e a violencia machista e hai que repetilo cada día, todas as veces que sexa necesario".

Silva destacou a importancia de xornadas como a celebrada no campus pontevedrés para poñer enriba da mesa os datos "que amosan a crueldade da situación que viven as mulleres" e buscar o debate e propostas para o cambio. "Non só –destacou- desde a violencia de xénero, senón tamén desde os datos da invisibilidade. Como non aparecemos nos medios, non somos importantes, e iso vai xerando un modelo de sociedade no que nós, as mulleres, non contamos porque non estamos". "Isto ten que cambiar –concluíu-. Estamos formadas, temos moito que aportar e somos a metade da poboación. E ademais hai que ser contundente, non hai que tapar o que acontece".