Noticias

Catorce certames acadan financiación a través das axudas a festivais musicais e de artes escénicas

O orzamento total desta liña ascende a 130.000 euros e a resolución foi aprobada esta mañá en Xunta de Goberno


10 agosto 2018
axudas a festivais musicais e de artes escénicas

Catorce festivais musicais e dous de teatro repartiranse os 130.000 euros das axudas convocadas polo Servizo provincial de Cultura para certames de música e artes escénicas por segundo ano consecutivo. A resolución desta liña foi aprobada esta mañá na sesión da Xunta de Goberno e, segundo asegura o deputado de Cultura Xosé Leal, o seu obxectivo é "apoiar a promoción e a difusión de festivais consolidados no ámbito da música e das artes escénicas, a maioría deles con grande repercusión tanto no país como internacionalmente".

Os festivais beneficiarios das axudas, no campo musical, son o XVIII Festival Xironsa, promovido pola Asociación Cultural Corbillón de Cambados, con 8.246,56 euros; o Canjazz 2018 de Cangas organizado pola Asociación de Jazz de Cangas, con 9.178,78 euros; o Vilariño Folk de Cangas, con 7.000 euros, organizado por a Asociación Cultural O Gato; o Festival Armadiña Rock da Asociación Cultural Deportiva e Medioambiental Armadiña de Poio, con 12.549,12 euros; o XII Festival Alternativo Millo Verde de Redondela, con 8.031,43 euros; o Festival IKFEM Eurocidade de Tui-Valença, da Asociación Xuventudes Musicais de Tui, con 10.182,71 euros; o XV Revoltallo de Música Emerxente de Vigo, con 5.378,19 euros; o Festival Rockin'Vila, con 4.804,52 euros, organizado pola Asociación Cultural PIB Crew de Vilanova de Arousa; a III Edición Vilablues da Asociación Cultural Galiza Blues de Vilagarcía de Arousa, con 9.680,75 euros; o IX Kanekas Metal Fest da Asociación Cultural Morrazica de Cangas con 3.585,47 euros; o Morrasound Rock Festival da Asociación Cultural Fontenla de Moaña, con 7.242,63; o IV Festival Intercéltico O Son do Pazo do Círculo Cultura e Deportivo Santa Eulalia de Mos, con 2.868,37 euros; O Festival Rock In Río Tea da Asociación Xuvenil Falcón D'Ouro de Ponteareas, con 8.963,65 euros; e o Festival Groba da Asociación da Asociación Ponteamusica de Ponteareas, con 6.955,80 euros.

No eido do teatro, as axudas foron para a XXXV Mostra Internacional de Teatro Cómico e Festivo de Cangas da Asociación Cívica Cultural Xiria de Cangas, con 11.832,02 euros, e para a XIX edición do Festival Internacional de Títeres de Redondela, con 13.5000 euros.

As bases desta liña de subvencións establecían como obxectivo promover certames que difundan teatro e música en galego e que se levaran a cabo, como mínimo, en dúas edicións consecutivas nos tres últimos anos. Trátase dunha liña de axudas que se convocara o pasado exercicio por primeira vez, co obxecto xenérico de impulsar os sectores das artes escénicas e musicais, por considerar que se trata de elementos claves da creatividade artística e da dinamización cultural da provincia.

Requisitos

En canto aos requisitos específicos, os festivais de música solicitantes debían ofertar unha duración mínima de dúas xornadas e contar cun mínimo de oito grupos, dos cales catro deben ser grupos galegos ou ter a presenza de máis de 15 compoñentes galegos, así como interpretar obras de autoría galega. Ademais, era preciso incluír na programación actividades paralelas de posta en valor do sector musical galego ou de formación musical.

Os Festivais de Artes Escénicas tamén deben ter unha duración mínima de dúas xornadas e contar cun mínimo de oito compañías, das cales un mínimo de tres deben ser galegas ou poñer en escena obras de autoría galega e que empreguen a lingua galega. A programación debía incluír actividades paralelas de posta en valor do sector teatral galego ou formativas.

En ambas modalidades, as entidades solicitantes teñen a obriga de empregar a lingua galega na comunicación nos diferentes soportes e no desenvolvemento das actividades paralelas, sen prexuízo do uso doutras linguas oficiais.

Para adxudicación destas axudas tivéronse en conta criterios de valoración con respecto á ultima edición do Festival solicitante como son o número de grupos – compañías ou integrantes; a asistencia ao festival; as actividades ou accións paralelas realizadas; e as achegas propias ao proxecto. Tamén se tiveron en conta criterios con respecto á edición do 2018, como a antigüidade do festival; as actividades paralelas a levar a cabo; e a viabilidade do proxecto en relación á porcentaxe de subvención solicitada e orzamento total.