Noticias

Esgotadas en 24 horas as prazas dispoñibles para as visitas teatralizadas ao Castelo de Soutomaior con case 5.000 persoas en lista de agarda

A empresa Troula dirixirá estas visitas, dirixidas ao público familiar, que comezan este domingo e se desenvolverán os días, 20, 21, 28 de outubro, e o 4 de novembro


11 outubro 2018
Rolda de prensa de Carmela Silva

A presidenta da Deputación de Pontevedra Carmela Silva, amosou esta mañá en rolda de prensa a súa satisfacción ao esgotarse en apenas 24 horas todas as prazas dispoñibles para as dez visitas teatralizadas ao castelo de Soutomaior, que se van desenvolver os días 14,20,21 e 28 de outubro, e tamén o 4 de novembro. O proceso de inscricións abriuse o luns pola mañá a través do correo electrónico do castelo de Soutomaior e en 24 horas cubríronse todas as prazas, recibindo máis de 5.000 solicitudes. A día de hoxe hai lista de espera en tódolos días previstos.

Máis polo miúdo, trátase de dez funcións de aproximadamente 45 minutos que executará a empresa Troula Animación S.L. e que achegarán ás familias as historias desde un punto de vista próximo, divertido e participativo. Ademais, para levar a cabo a actividade vanse aproveitar as salas interactivas do castelo e, deste xeito, as e os participantes farán un percorrido polo edificio acompañadas e acompañados dos antigos habitantes do castelo, bufóns, cabaleiros, cociñeiras e cociñeiros, trobadoras e trobadores, e a gran novidade deste ano será a pantasma do castelo, "O Alemanote".

Con estas visitas, que este ano celebran a súa terceira edición, o Goberno de Carmela Silva quere ofertar unha forma diferente de descubrir e coñecer o castelo de Soutomaior dirixida a todas as persoas que integran a familia, desde as máis pequenas ás maiores, dun xeito divertido e interactivo para que as nenas e nenos poidan coñecer a súa historia desde un punto de vista máis próximo, de forma que cada visita sexa unha auténtica aventura. Desde a reapertura do castelo o pasado mes de maio, xa pasaron por Soutomaior 23.000 persoas, un 110 % máis que no mesmo período maio-setembro de 2017.