Noticias

Este venres chega a Pontecesures a nova campaña do CAAN lanzada pola Deputación de Pontevedra para fomentar a tenza responsable de animais

A Deputación situará un punto de información na "Plazuela" da vila xunto a outras ONG solidarias a través do cal dará a coñecer "Esteriliza, adopta"


26 decembro 2019
CAAN

A partir das 11 horas deste venres 27 de decembro o Centro de Acollida e Protección de Animais (CAAN) que xestiona a Deputación de Pontevedra na Armenteira (Meis) terá un espazo propio no mercadiño solidario de Pontecesures. No punto informativo, situado na "Plazuela", a institución provincial divulgará durante toda a mañá a nova campaña do CAAN para o fomento da adopción de animais e a esterilización para evitar a cría irresponsable. Ademais dos trípticos informativos e de carteis, tamén se distribuirán libros dos Bolechas que narran a vista da familia animada ao CAAN.

A campaña "Esteriliza, adopta" foi lanzada pola Deputación con motivo do Nadal para facer fincapé, tal e como explicou a presidenta, Carmela Silva, "na importancia da adopción fronte á compra. Nestas festas moitos animais son obxecto de agasallo entre as máis pequenas e pequenos da casa e queremos concienciar a quen estea pensando en facer este regalo para que adopte un can ou cadela en lugar de mercalo. É unha actitude moito máis responsable, máis social e acorde co benestar animal".

Deste xeito "Esteriliza, adopta" chega ata Pontecesures para dar a coñecer que as adopcións son gratuítas e as persoas interesadas reciben, ao longo do proceso, información sobre o can ou cadela que mellor pode adaptarse ás necesidades das familias. Ademais os animais saen do CAAN vacinados, desparasitados e esterilizados.

O CAAN dá servizo a 48 concellos da provincia, cunha poboación estimada de 400.000 habitantes. En total, este ano adoptáronse 461 cans e cadelas, os últimos, Lisa e Bel, o pasado luns 23 de decembro. Así, o 2019 estase a situar como o ano con maior número de adopcións, por riba do 2018, cando se acadaron as 360, ou do 2016 que con 430 adopcións foi o ano que rexistrou o maior número de cans adoptados e cadelas adoptadas.