Noticias

Galaicos: un pobo entre dous mundos chega este mércores ao Museo da Prehistoria de Valencia

O acto de apertura da mostra da Deputación de Pontevedra, que permanecerá aberta ata setembro, contará coa presenza do presidente da Deputación de Valencia


26 marzo 2019
Galaicos

A exposición Galaicos: un pobo entre dous mundos chega este mércores a Valencia tralo seu paso polo Museo Arqueolóxico Nacional de Madrid, onde foi visitada por máis de 18.000 persoas. A mostra da Deputación de Pontevedra, que se exhibirá no Museo da Prehistoria ata o 1 de setembro, abrirase ás 12.30 da mañá nun acto que contará coa presenza do presidente da Deputación de Valencia, Toni Gaspar. Xa pola tarde, o Museo valenciano acollerá ás 19.00 h unha conferencia sobre a civilización galaica e ás 20.00 h unha xornada de portas abertas que permitirán afondar nas pezas que integran Galaicos: un pobo entre dous mundos.

A Deputación de Pontevedra leva así á capital do Levante esta mostra itinerante que impulsou co obxectivo de amosar o nexo de unión e de confluencia cultural entre dous mundos: o Atlántico e o Mediterráneo. Deste xeito, a mostra presenta un carácter didáctico e explicativo e combina obxectos orixinais, réplicas, imaxes, ilustracións, textos e recursos audiovisuais para dar a coñecer o patrimonio arqueolóxico e cultural da comunidade galega.

Como principal novidade, con respecto ás pezas xa amosadas no Museo Arqueolóxico Nacional en Madrid, ata Valencia viaxan catro novos elementos: unha machada de talón e punta de xavelina, de bronce e pertencente ao xacemento da Cabeciña de Oia para explicar a transición do Bronce Final á Idade de Ferro; a Arracada de Vilar de Santos, que pretende amosar as influencias do mundo Mediterráneo en Galicia; a Tabula Lougeiorum, de comezos do século I, que introduce a chegada de Roma e simboliza os pactos de hospitalidade entre galaicos e romanos; e a ánfora de San Mariño de Bueu. Ademais, e tamén como novidade, os materiais divulgativos de Galaicos: un pobo entre dous mundos estarán dispoñibles en italiano debido ao numeroso público dese país que visita a Comunidade Valenciana.

Galaicos: un pobo entre dous mundos xurdiu como resultado do programa integral que está a desenvolver a Deputación de Pontevedra para poñer en valor os xacementos galaico-romanos da provincia mediante unha estratexia de promoción turística. Así, a través deste proxecto preténdese comprender a dinámica socioeconómica da provincia de Pontevedra na antigüidade, ampliar a oferta turística cultural que tamén é un dos obxectivos do Plan estratéxico de turismo, e recuperar os espazos patrimoniais.