Noticias

A parroquia de Donsión organizará a XX Matanza Tradicional do Porco

A data provisional que se valora para a celebración da festa é o domingo, día 10 de febreiro, dúas semanas antes da Feira do Cocido.


22 novembro 2018
Lalín
Reunión Soutolongo matanza

As veciñas e veciños da parroquia de Donsión serán os encargados de organizar a celebración da próxima Matanza Tradicional do Porco que ten lugar cada ano de xeito paralelo á Feira do Cocido e que chega xa á súa XX edición. Así o comunicou o alcalde de Lalín, Rafael Cuíña, coincidindo co encontro veciñal que mantivo acompañado polo concelleiro de Rural, Miguel Medela, onte á noite cos habitantes da devandita parroquia. A data provisional que se valora para a celebración da festa é o domingo, día 10 de febreiro, dúas semanas antes da Feira do Cocido.

Rafael Cuíña e Medela agradeceron a "boa disposición amosada pola veciñanza de Donsión logo de propoñerlle a posibilidade de organizar a matanza", unha iniciativa "que dende un principio acolleron con especial receptividade e ilusión", explicou. O alcalde e o concelleiro tamén anunciaron que a recreación se celebrará na Casa de Amador, o pazo desta parroquia, unha construción tradicional e un espazo singular que se antolla propicio para acoller as diferentes actividades da matanza que se desenvolverán ao longo da xornada. Ademais, o  campo da festa será o lugar elixido para o xantar, onde ademais se habilitarán zonas para aparcar.