Noticias

O Concello anima aos lalinenses a participar na carreira solidaria nocturna a prol do Mencer que se celebra o día 25

O prazo de inscricións mantense aberto ata o día 23 na páxina sportmaniacs.com


14 maio 2019
Lalín
Concello de Lalín

Hoxe presentouse a Carreira solidaria nocturna "O Mencer-Lalín" que se celebra o sábado, día 25 de maior organizada polo Club Atletismo Deza e a Asociación O Mencer, en colaboración co Concello de Lalín.  O 100% da recaudación desta proba vai destinada á Asociación de Voluntariado O Mencer, que xestiona o banco de alimentos na comarca do Deza e que precisa axuda urxente de todos e todas para sanear as súas contas. É po iso polo que dende o Concello de Lalín se anima a participar a toda a cidadanía nunha carreira que ademais conta con probas deseñadas para todas as idades e cun circuíto urbano en categoría absoluta apto para todos os niveis e cunha distancia de 6 quilómetros.

Trátase dunha carreira posta en marcha por iniciativa dos directivos de O Mencer, que contan coa colaboración do Club Atletismo Deza, do Concello e co traballo e esforzo de distintos voluntarios e patrocinadores (empresas, autónomos e particulares) que en menor ou maior medida fixeron distintos aportes e aos que se lles dá as grazas dende a organización. Como sinalaron os organizadores, haberá moitas sorpresas e dentro do evento tamén se celebrará a "carreira da visibilidade". Trátase dunha proba organizada en colaboración con diferentes colectivos locais destinada a corredores adultos e infantís con diversidade funcional que terá lugar dentro da carreira solidaria. O obxectivo desta proba é o de darlle visibilidade e recoñecemento á discapacidade. As inscricións en categoría absoluta teñen un prezo de 5 euros, destinados integramente a O Mencer, mentres que as demais probas son de valde. Os corredores deben apuntarse na páxina web sportmaniacs.com antes do día 23 de maio.

A entrega de dorsais realizarase o propio día da carreira a partir das 19.00 horas, nas inmediacións da zona de saída, que se sitúa no Quilómetro Cero. As probas escolares comezarán ás 20.30 e a absoluta ao finalizaren estas. Ao finalizara a carreira terá lugar a entrega de trofeos e haberá sorteos e agasallos.