Noticias

O Concello de Lalín estrea unha nova ruta de sendeirismo entre Cadrón e Palio, polo entorno dos sobreirais de Arnego

O proxecto ten o obxectivo de consolidar a oferta turística de Lalín a través da posta en valor da súa riqueza natural, histórica e paisaxística


24 abril 2019
Lalín

O Concello de Lalín, a través da concellería de Turismo, estreou hoxe un novo recurso que contribúe á diversificación e incremento da oferta turística do municipio. Trátase dunha nova ruta de sendeirismo que quedou xa completamente sinalizada e que discorre por camiños e sendeiros naturais que foron nalgúns casos acondicionados e que comunica as localidades de Cadrón e Palio polo entorno do espazo da Rede Natura 2000, Sobreirais do Arnego. O obxectivo deste novo roteiro é o de consolidar a oferta turística de Lalín a través da posta en valor da súa riqueza natural, histórica e paisaxística, ao tempo que se dinamiza o desenvolvemento do rural en base ao turismo. A actuación tamén segue a liña do establecido no Plan Estratéxico de Turismo do Concello de Lalín que remarca a necesidade de combinar diferentes potencialidades do municipio como a gastronomía, coas riquezas das zonas agrogandeiras e os recursos naturais. Lalín é un concello privilexiado pola enorme diversidade paisaxística que posúe e este factor é aproveitado con proxectos como o presente para para atraer visitantes e poñer en valor o noso rural.

Dentro destes obxectivos, a área protexida dos Sobreirais do Arnego, que comparten Lalín, Agolada e Vila de Cruces, constitúe un dos principais e, ao mesmo tempo, menos coñecidos atractivos paisaxísticos do termo municipal lalinense. Porén a consolidación desta ruta de sendeirismo permitiralle aos visitantes coñecer e gozar das paraxes naturais que o río Arnego vai esculpindo entre bosques centenarios, pontes, camiños, miradoiros naturais etc. Para tal fin o proxecto do Concello executouse coa mellora dun percorrido duns 14 quilómetros formado por camiños e sendeiros xa existentes e que comunican as parroquias de Cadrón e Palio. Os traballos consistiron basicamente na recuperación dos sendeiros naquelas zonas nas que a maleza o facía impracticable, mediante desbroces manuais selectivos e que non danaron a biodiversidade nin os ecosistemas. A isto, sumouse a colocación de sinalización permanente e integrada no entorno en todo o percorrido dende Cadrón a Palio. Para este fin utilizáronse postes e outros elementos consorte aos criterios establecidos de homologación por parte das diferentes entidades xestoras. Ademais da riqueza paisaxística, esta ruta permite o desfrute de elementos patrimoniais como pontes e muíños e doutros bens próximos como a igrexa protorrománica de Palio, ou a antiga fábrica de papel de Rodís.

Os Sobreirais do Arnego constitúen unha area natural protexida por diferentes figuras de protección entre elas, a Rede Natura 2000. Ocupan 1.124 hectáreas repartidas entre os concellos de Lalín, Agolada e Vila de Cruces. Este conxunto concentra o maior número de exemplares de sobreira (Querqus suber) do noroeste peninsular, que prosperan grazas ao microclima do val do río Arnego, ao que hai que engadirlle un  ecosistema cunha biodiversidade extraordinaria, tanto vexetal como animal.

O Concello de Lalín agradece o gran traballo realizado de xeito desinteresado polo biólogo Martiño Nercellas, para a posta en marcha desta iniciativa.