Noticias

O Concello recibe a totalidade da subvención para rehabilitar a estatua de Ramón Aller e o cruceiro de Moneixas

Son 21.390,25 euros que permitirán devolver estas pezas, practicamente, ao seu estado orixinario de conservación


14 maio 2019
Lalín
Concello de Lalín

O Concello de Lalín vén de recibir unha achega de 21.390,25 euros procedentes da orde de axudas para a rehabilitación e a sinalización do patrimonio histórico e cultural que convoca a Deputación de Pontevedra, que servirán para rehabilitar o cruceiro da parroquia de Moneixas e a estatua de Ramón Aller situada a carón da igrexa de Lalín. Como sinala o concelleiro de Turismo e Obras, Francisco Vilariño, "a través das xestións realizadas dende a concellería fomos capaces de conseguir a totalidade da cantidade económica solicitada ao abeiro desta achega para completar a totalidade da actuación". O edil lembrou que o Concello xa conta con todos os permisos por parte da Dirección Xeral de Patrimonio para acometer esta actuación que se poñerá en marcha nas próximas semanas tan pronto como se contraten os traballos cunha empresa especializada. Esta iniciativa lévase a cabo dentro do plan global de restauración de elementos escultóricos patrimoniais posto en marcha polo Concello de Lalín e que xa deu comezo coas obras de arranxo da estatua de Joaquín Loriga, que se desenvolven durante estes días.

O monumento a Ramón Aller situado a carón da igrexa, no parque lateral, atópase nun estado de conservación estable pero esteticamente moi mellorable ao verse desvirtuado pola ampla cantidade de sucidade e colonización biolóxica de plantas e musgo que o cobren. Tamén hai sucidade causada por excrementos de aves e obsérvase unha capa de mugre provocada pola humidade e a polución atmosférica. As tarefas de restauración  serán similares ás que se están levando a cabo en Loriga, coa execución de traballos de limpeza mecánicos e mediante a utilización de axentes químicos que permitirán a eliminación de todos os restos. Así mesmo, no caso de atopar fracturas ou zonas debilitadas durante a intervención, acometerase a súa solución coa aplicación de produtos adecuados e afíns á pedra. Ademais, tamén se restaurarán os elementos metálicos presentes na base da escultura. Esta peza foi esculpida polo mestre Francisco Asorey e inaugurada no 1960. Representa a figura de "Don Ramón" vestido cos seus hábitos e portando nas súas mans un astrolabio e varias táboas sendo, ao igual que a de Loriga, unha estatua de enorme valor e moi querida por todo o pobo de Lalín.

A segunda reparación contemplada no proxecto afectará ao cruceiro de San Adrao da parroquia de Moneixas. Trátase dun ben de enorme interese e valor patrimonial e histórico datado no ano 1963 ao que lle falta o capitel e  a cruz por mor dos efectos dun temporal de vento que no 2015 derrubou sobre o mesmo unha árbore provocándolle graves fracturas. Deste xeito, a reparación do cruceiro -que se atopa nunha parcela recentemente adquirida polo Concello de Lalín- é urxente e necesaria para volver a peza ao seu correspondente estado de conservacións. Así, a proposta de restauración pasa pola execución de traballos de limpeza mecánica para eliminar os restos de colonización biolóxica e vexetal ao que se sumarán actuacións de limpeza con axentes químicos para neutralizar calquera resto e devolver a pedra ao seu estado orixinario. Ademais, será necesario realizar tarefas de consolidación da pedra nas áreas fracturadas e, finalmente, realizarase a adhesión dos elementos fracturados mediante morteiro para recuperar por completo o cruceiro.

Francisco Vilariño fixo fincapé na trascendencia desta iniciativa -que se suma á da estatua de Loriga - como proposta que permitirá devolver dous elementos de inmenso valor patrimonial e auténticos símbolos indentitarios da vila, practicamente ao seu estado de conservación orixinal. A actuación -indicou- é moi ambiciosa e suporá un antes e un despois para estas pezas que precisaban con urxencia unha restauración que, ao mesmo tampo, tamén dende o punto de vista turístico, incrementará notablemente o seu atractivo.