Noticias

O AECT Rio Minho visita o municipio portugués de Águeda para coñecer o seu sistema de alugueiro de bicicletas eléctricas

O agrupamento europeo valora implementar un equipamento similar no territorio do Río Miño Transfronteirizo que fomente a mobilidade alternativa


12 agosto 2018
O AECT Rio Miño visita o municipio portugués de Águeda

O secretariado técnico do AECT Rio Minho desprazouse ata o municipio portugués de Águeda para coñecer sobre o terreo o proxecto de mobilidade sostible que desenvolve a cámara lusa, unha das pioneiras na instalación de bicicletas de alugueiro eléctricas. Con esta visita, e a anterior realizada á Puebla de Sanabria (Zamora) o pasado mes de maio, o equipo do AECT Rio Minho está a estudar a xestión e o impacto deste tipo de iniciativas coa idea de implementalas no territorio do Río Miño Transfronteirizo a través do proxecto Smart Minho.

Precisamente, unha das accións recollidas dentro do proxecto de cooperación institucional Smart Minho (cofinanciado ao 75 % polo Fondo Europeo de Desenvolvemento Rexional), do que son socios a Deputación de Pontevedra, o CIM Alto Minho, o AECT Rio Minho e a Fundación CEER, é a posta en marcha de experiencias de mobilidade suave entre ambas as beiras do río de cara a incrementar a mobilidade local transfronteiriza, especialmente a alternativa.

Por outra banda, tamén a través de Smart Minho, estase a traballar nun Plan de mobilidade sustentable para o Río Miño Transfronteirizo que favoreza os desprazamentos de persoas e vehículos na fronteira galego-portuguesa, prestando especial atención aos fluxos entre os polos urbanos das eurocidades, nos que se concentran máis de 100.000 habitantes. Durante estes meses púxose en marcha unha enquisa de participación cidadá e tiveron lugar varios encontros con axentes sociais. Ademais, en setembro o AECT manterá sesións de traballo con alcaldías e sectores da mobilidade coa participación de expertas e expertos europeos neste asunto.

Así mesmo, o AECT Rio Minho está a desenvolver o proxecto Boosting Minho River Cross-Border Mobility, financiado pola iniciativa europea B-Solutions, para analizar os problemas de índole legal e administrativa que lle afectan á mobilidade transfronteiriza no ámbito do río Miño.