Noticias

O auditorio de Príncipe Felipe terá nova cuberta e fachada

Eva Vilaverde despediuse hoxe como deputada do persoal dos centros de acollida e asegurou que nestes catro anos "cumpríronse os obxectivos marcados"


28 xuño 2019
Eva Vilaverde en Príncipe Felipe

O Centro Príncipe Felipe renovará a curto prazo a fachada e a cuberta do auditorio. Así o anunciou hoxe a deputada delegada en funcións, Eva Vilaverde, quen aproveitou para anunciar varias obras de mellora que se realizarán durante o verán e outras en fase de proxecto e contratación, e para despedirse do persoal como responsable política do ente provincial. Vilaverde manifestou que nestes catro anos á fronte do centro "cumpríronse os obxectivos marcados" e agradeceu a traballadoras e traballadores a súa entrega e colaboración.

Vilaverde sinalou que nos meses de verán acometerase a impermeabilización da cuberta do patio do centro infantil e a escola infantil e substituirase o pavimento da cociña xeral. Destacou que está en fase de contratación a substitución das carpinterías e a reforma das fachadas do Centro de Educación Especial e o Centro Infanto-Xuvenil Agarimo e está proxectada a reparación da cuberta e fachada do auditorio, para o que tamén existe unha proposta de contratación valorada en 303.000 euros. A estas actuacións haberá que sumar outras como a cuberta do patio exterior do Colexio de Educación Especial ou a substitución de tubaxes en varios edificios, para o que xa quedan aprobadas tamén varias suplementacións orzamentarias.

A deputada nacionalista, que cesa no seu cargo dentro da institución provincial o vindeiro mércores, explicou que está satisfeita do traballo realizado nos catro anos, durante os que se mellorou tanto a xestión administrativa e funcionamento dos centros, as instalacións, así como o servizo prestado ás persoas usuarias: as e os menores en acollemento.

Vilaverde destacou que o orzamento destinado a Príncipe Felipe no mandato roldou os 45 millóns de euros, cunha grande partida destinada a novos investimentos e infraestruturas. Deste xeito, lembrou a mellora no acceso que resolveu o problema de seguranza viaria, así como as renovacións das cubertas da Escola-Fogar e do edificio de Maternais e da Escola Infantil, a substitución da cuberta do patio do CEIP, a substitución de tubaxes de calefacción e auga quente en diferentes edificios, ou as reformas de accesibilidade de baños para adaptalos a usuarias de mobilidade reducida, entre outras moitas obras. "O traballo feito foi intenso e estou satisfeita pola modernización que se ten conseguido, polo que animo a continuar nesta liña", asegurou.