Noticias

O Goberno de Carmela Silva aproba o expediente de contratación para as obras de mellora da EP-5003 ao seu paso pola Cañiza e Arbo

A actuación ten un orzamento de preto de 900.000 euros para a reposición do firme e a mellora da seguridade viaria


12 outubro 2019
Obras estrada A Cañiza-Arbo

A Xunta de Goberno da Deputación de Pontevedra aprobou este venres o expediente de contratación, mediante procedemento aberto simplificado, da obra de reposición do firme e a mellora da seguridade viaria na EP-5003, entre A Cañiza e Arbo. Esta actuación ten un orzamento de licitación de 886.829,11 euros.

A obra consistirá no fresado e na reposición do firme da estrada. Haberá tamén un treito no que se execute unha capa de microaglomerado en frío. Por outra banda, revisarase a sinalización vertical de velocidade, elevaranse varios pasos de peóns, estreitaranse os carrís na proximidade dos pasos de peóns coa finalidade de producir un calmado de tráfico, reordenarase a explanada existente nas inmediacións do CP de Valeixe e redistribuiranse os espazos da plataforma nun dos treitos para favorecer o tránsito peonil.